Áıelin qatygezdikpen óltirgen Qýandyq Bıshimbaevqa qatysty kezekti sot otyrysy ótip jatyr. Aıyptalýshy Saltanat Núkenova qaıtys bolǵan kúni bolǵan jaıttardy baıandady, dep habarlaıdy Egemen.kz.
Q.Bıshimbaevtyń aıtýynsha áıeliniń ólimine deıin ekeýiniń arasynda jaqsy qarym-qatynas bolǵan. Jaqsy kóńil-kúıde ekeýi Saltanattyń qurbysymen birge konsertke de barǵan.
«Men eshqashan Saltanatty qasaqana óltiremin dep oılamaǵam. Biz bir-birimizdi jaqsy kórdik. Sol kúni biz uıqydan jaqsy kóńil-kúımen oıandyq. Saltanattyń qurbysy Dıma Bılannyń konsertine shaqyrdy. Saltanat meniń de olarmen birge barǵanymdy qalady. Meniń ol konsertke barǵym kelgen joq. Biraq Saltanattyń kóńilin qaldyrǵym kelmedi. Solaı birge baratyn bolyp sheshtik. Saltanat konsertke kıip baratyn durys kıimim joq dep buldana bastady. Onyń zattarynyń kóp bóligi Pavlodarda qalǵan edi. Sodan oǵan kıim alýǵa dúkenge bardyq. Ol birneshe kıim aldy. Keıinirek qurbysymen kezdesýge ketti, al men óz jumystarymmen kettim», dedi Q.Bıshimbaev.
Budan soń Saltanat qurbysy Aıdamen meıramhanada jolyqqan. Olar Qýandyqqa shampan ala kelýin suraǵan. Qýandyq shampan alyp kelemin dep konsertke keshigip kelgen. Al bul Saltanatqa unamaǵan. Keıinirek konsert zalyna kelgende Qýandyq tanys qurbysyn kórip amandasqanda Saltanat qyzǵanyshyn bildirgen.
«Men konsertte uzaq otyra almadym, Saltanatqa qaıtqym keletinin aıttym. Bul áreketim de Saltanatqa unamady. Konsertten shyǵyp, garderob janynda urys shyǵara bastady. Qurbysynyń aldynda uıatqa qaldyrdyń dep renjidi. Burynǵy renishterin qaıta aıtyp, urys ýshyǵyp ketti. Ekeýimiz jaıaý meıramhanaǵa bardyq. Ol jaqta da kekiljiń uzaqqa sozyldy», dedi aıyptalýshy.