Astana qalasynyń qylmystyq ister jónindegi mamandandyrylǵan aýdanaralyq sotynda Qýandyq Bıshimbaevtyń isi qaralyp jatyr. Kezekti sot otyrysynda Bıshimbaev qaıǵyly oqıǵa boıynsha óz nusqasyn aıtyp berdi, dep jazady Egemen.kz.
Q. Bıshimbaev 9 qarasha kúni «Bau» meıramhanasynda bolǵan oqıǵany baıandap, Saltanat es-tússiz jatqanda qandaı shara qoldanǵanyn aıtty.
Onyń aıtýynsha, ol Saltanattyń qasynan shyǵa almaı, B.Baıjanovqa «Bepanten» ákelýdi tapsyrǵan. Bıshimbaev sol kúni arakidik jınalysqa qatysyp, áıeliniń jaǵdaıyn baqylap otyrǵan.
«Bólmege kirip júrgenimde ol uıyqtap jatty, tipti qoryldady. Men Baqytjannan ony qalaı oıatýǵa bolatynyn suradym. Baıjanov ózi biletin dáriger Saltanatqa ammıak berýge keńes bergenin aıtty. Men zalǵa kirip, ammıakty dákege tamshylap, Saltanatqa ıiskettim. Sol kezde ol murnymen emes, aýzymen tynys alyp jatqanyn baıqadym. Syrtqa shyǵyp, Baqytjanǵa eshteńe sezbeı turǵanyn aıttym. Ol «jedel járdem shaqyraıyq pa?» dep surady. Kóripkeldiń buǵan deıin aıtqany esime túsip ketti, ol Saltanat keshke qaraı esin jııady degen edi. Sonda taǵy kútýdi uıǵaryp, jınalysqa kettim, sol jerde jarty saǵat kóleminde boldym. Keıin Saltanatty oıatqym keldi, biraq ony oıata almadym. Sol kezde ol qoryldaǵynyn da doǵarǵan. Keıin Baqytjannan tamaq surap, bólmeden shyǵyp kettim. Ishke qaıta kirgende onyń bet-júzi, denesi salqyn bolǵanyn baıqadym. Tamyr soǵýyn izdeı bastadym, biraq taba almadym», dedi Bıshimbaev.
Osy arada oqıǵaǵa qatysýshylar Núkenovany qutqarý maqsatynda oǵan jasandy dem bergisi kelgenderin de aıtty.
«Men shoshyp kettim de, Baqytjanǵa telefon soǵyp, tez kelýin suradym. Ol da tamyr soǵýyn izdeı bastady, alaıda taba almady. Sonda Baıjanov jedel járdem shaqyrýǵa ketti. Barlyq jaǵdaı osylaı boldy. Dárigerler jasandy dem berińder dedi. Saltanatqa jaqyndap, aýzymdy ashqym kelgende, onyń ıegi qarysyp qalǵanyn kórdim. Onyń qaıtys bolǵanyn sol kezde túsindim. Jedel járdem kelip, reanımasııa sharalaryn júrgize bastady, men eseńgirep qaldym, as úıge baryp, pyshaq alyp, óz-ózime qol jumsaǵanym durys bolar dep te oıladym. Sosyn polısııa keldi», dedi aıyptalýshy.