Elorda turǵyny densaýlyǵynda kinárat bar júrgizýshini aldap ketken. Vıdeǵa túsip qalǵan sát jelide tarap júr, ony jábirlenýshiniń qyzy júktegen, dep jazady Egemen.kz.
Vıdeo avtorynyń aıtýynsha, jolaýshy bıznes sanatyna jatatyn taksıge tapsyrys berip, sońynda jolaqysyn tólemeı ketip qalǵan.
«Ákem ony Astanadaǵy barlyq keptelister arqyly bir saǵat boıy alyp júrdi. Al ol qaıtyp kelemin dep aqshasyn bermeı ketip qaldy. Meniń ákem sańyraý, sóıleı almaıdy. Kúni boıy nesıesin jabý úshin taksıst bolyp jumys isteıdi», dep jazdy vıdeo avtory.
Qalalyq polısııa departamenti qashyp ketken jolaýshyny taýyp aldy. Anyqtalǵandaı, ol buǵan deıin de alaıaqtyq jasap júrgen.
«Buzaqy keltirilgen shyǵyndy tolyǵymen ótep, keshirim surady. Zardap shekken tarap pikir berýden bas tartty», delingen Astana qalalyq PD habarlamasynda.