Shymkent qalasynyń kóshesinde er adam áıeldi sebepsiz tepkilep, betinen judyryǵymen urǵan, dep habarlaıdy Egemen.kz.
Oqıǵa beıne jazbaǵa túsip qalǵan.
Jábirlenýshiniń aıtýynsha, ol 2024 jyldyń 13 aqpanynda dosynyń týǵan kúnine bara jatqan. Ol gúl dúkenine kirip, gúl satyp alǵan. Keıin taksı shaqyrý úshin dúkenniń syrtyna shyǵyp turǵan. Kenetten belgisiz bireý ony artynan aıaqpen tepkenin sezgen.
«Artyma qarasam, aıaǵynda áreń turǵan er adamdy kórdim. Nege ekeni belgisiz, bir orynda qatyp qaldym, ún de qata almadym, maǵan baıqaýsyzda tıip ketti dep oıladym. Biraq ol maǵan jaqyndap basymnan qatty urdy. Kózildirigimniń qalaı ushyp ketkenin de baıqamaı qaldym», dep esine aldy áıel.
Jábirlenýshiniń aıtýynsha, ol kóshede ótip bara jatqan adamdardan kómek suraǵan, alaıda oǵan eshkim kómektespegen.
«Sol kezde dúkenge kirip kettim. «Polısııa, kómektesińder!» dep aıqaılaı bastadym. Adamdar qasymnan meni kórmegendeı óte berdi. Men jylap jiberdim, eseńgirep qaldym. Eresek áıelder «Oǵan ne aıttyń?» degen sııaqty suraqtardy qoıdy. Ýchaskelik polısııa qyzmetkerleri de sol suraqty qoıdy, nege ekeni belgisiz, tergeýshi men krımınolog ta kiná menen dep oılady. Maǵan shabýyl jasaǵan adam da polısııanyń kózinshe meni taýyp alyp, óltiremin dep aıǵaılady», dedi ol.
Áıelge shabýyl jasaǵan adamnyń jasy 50-de ekeni belgili boldy. Boıjetkenniń aıtýynsha, ol basynan alǵan soqqynyń saldarynan mıy shaıqalyp, beli aýyryp, tereń psıhologııalyq jaraqat alǵan.
Shymkent qalalyq soty habarlaǵandaı, 50 jastaǵy er adam «buzaqylyq jasaǵany úshin» qamaýǵa alyndy.
«Sottalýshy O. 13 aqpan 2024 jyly saǵat 18:00 shamasynda Shymkent qalasy Nursát turǵyn alabynyń №1 ǵımaratynyń janynda ornalasqan «Nursát-2» dúkeniniń aldynda mas kúıinde jábirlenýshini uryp-soqqan. Ol jábirlenýshini arqasynan sebepsiz teýip, odan keıin «bet tusynan judyryqpen uryp, densaýlyǵyna zııan keltirgen. Sottalýshynyń kinási jábirlenýshiniń aıǵaqtarymen, zattaı dáleldemelerimen, sot-medısınalyq saraptamasynyń qorytyndysymen, jáne is boıynsha jınalǵan basqa da dáleldermen keltirildi», dep habarlady Shymkent soty.
Sot úkimimen er adam buzaqylyq jasaǵany úshin kináli dep tanylyp, 1 jylǵa bas bostandyǵynan aıyryldy.
Sottyń úkimi zańdy kúshine engen joq.