Petropavl polıseıleri 30 jastaǵy qala turǵyny jasaǵan birqatar alaıaqtyq deregin ashty. Eshbir jerde jumys istemeıtin áıel birneshe jyldan beri ózin tabysty kásipker retinde tanystyryp, birneshe adamnan aqsha surap alyp, olarǵa zor shyǵyn keltirgen, dep habarlaıdy Egemen.kz.
Polisia.kz saıtynyń málimetinshe, 2019 jyly alaıaq áıel jábirlenýshilerdiń birin sendirip, shuǵyl túrde jyljymaıtyn múlik alamyn dep aqsha surap alǵan. Aldanyp qalǵanyn bilmegen áıel páterin kepilge qoıyp, iri somada nesıe alǵan. Saldarynan oǵan 12 mıllıon teńge shyǵyn keltirilgen.
Qalalyq polısııa basqarmasynyń tergeýshileri kúdiktini tergeı kele, 45 myńnan birneshe mıllıondaǵan teńgege deıingi shyǵyn keltirilgen alaıaqtyqtyń 10 epızodyn anyqtaǵan.
Birtalaı ýaqyt ótse de jábirlenýshilerdiń kóbi oǵan senip, qaryzdary qaıtarylaryna úmittengen. Polısııaǵa tórteýi ǵana júgingen.
Polisia.kz málimdemesinde: «Bıyl naýryz aıynda Petropavl qalalyq soty oǵan 4 jylǵa bas bostandyǵynan aıyrý túrinde jaza taǵaıyndap, keltirilgen shyǵyndy óteýge mindettedi. Úkim zańdy kúshine endi», delingen.