«Din máseleleri boıynsha bilikti mamandar daıarlaý» jobasy aıasynda Atyraý oblysynda aqparattyq-túsindirý toptarynyń múshelerine arnalǵan oqytý semınarlary men trenıngteri ótti.
2024 jyldyń 3-4 sáýirinde Atyraý qalasyndaǵy «Aq Jelken» ortalyǵynyń májilis zalynda Qazaqstan Respýblıkasy Mádenıet jáne aqparat mınıstrliginiń Din isteri komıtetiniń qoldaýymen «Rýhanı jańǵyrý» qoǵamdyq qorynyń uıymdastyrýymen din máseleri boıynsha bilikti mamandardy daıyndaýǵa baǵyttalǵan is-shara ótti. Is-sharaǵa «Din zertteý ortalyǵynyń», meshitterdiń, orta jáne joǵary oqý oryndarynyń jáne t.b mamandary, ımamdary, psıhologtary men teologtary qatysty. Jıynda din máseleleri boıynsha túsindirý tobynyń músheleri – psıhologııa jáne pedagogıka mamany Týıǵanov Myrzabek Sardarbekuly jáne dintanýshy, teolog Ospanov Dálelhan Qonyrbaıuly semınar oqydy.
Myrzabek Týıǵanov «Destrýktıvti dinı ıdeologııalarǵa qarsy turýdaǵy dáleldeý ádisteri» taqyrybynda jalpy teorııalyq aqparat berip, qatysýshylarmen jumys jasady. Sondaı-aq «Jastardy destrýktıvti dinı uıymdarǵa tartýdyń aldyn alý nysandary men ádisteri» taqyrybymen Qazaqstandaǵy dinı jaǵdaılardy túsindire otyra, oǵan qatysty kúrdeli suraqtarǵa jaýap berý ádisterin úıretti.
Dálelhan Ospanov «Rýhanı adamgershilik qundylyqtardy ıdeologııaǵa aınaldyrý» taqyrybymen qatysýshylarǵa jastar arasyndaǵy táýekel toptaryn anyqtaý úshin profaılıng tehnıkasyn, ıaǵnı, qylmys jasaýǵa daıyn turǵan tulǵanyń syrtqy kelbetine, mımıkasyna, júris-turysyna qarap qalaı anyqtaýǵa bolatynyn túsindirdi. Sondaı-aq «Dinı ekstremızmniń aldyn alý jáne ońaltý jumystary» taqyrybynda qatysýshylarǵa psıhokorreksııalyq jumysta qoldanylatyn tulǵany zertteý ádisterin úıretti.
Sonymen qatar, semınarlar men trenıngter barysynda qatysýshylar tarapynan dáriskerlerge suraqtar qoıylyp, mándi jaýaptar alyndy.