«Batys Qazaqstan oblysynda sibir jarasyna shaldyqqan janýarlar kómilgen jerler tasqyn sý astynda qalyp, aınalaǵa qaterli dert taralý qaýpi týdy» degen aqparat taraǵan edi. Osy oqıǵaǵa oraı tıisti mekeme basshylary túsinikteme berdi, dep habarlaıdy Egemen.kz.
«Búgingi tańda Batys Qazaqstan oblysyndaǵy sý basqan óńirlerde 13 emes, 3 kómindi sý astynda qalǵany ras. Biraq sibir jarasynyń aýrý qozdyrǵyshtary erigen sýmen taralady degen sóz shyndyqqa janaspaıdy. О́ıtkeni kómindilerdiń barlyǵy veterınarııalyq-sanıtarııalyq talaptarǵa saı: betondalǵan jáne qorshalǵan. Qorshaǵan ortaǵa eshqandaı qaýip tónip turǵan joq», dedi oblystyq veterınarııa basqarmasy basshysynyń orynbasary Abzal Birálıev.
Osy mekemeniń bólim basshysy Nurqaıyr Qusaıynovtyń aıtýynsha, sý basqan mundaı oryndardy arnaıy mamandar baryp tekseredi, jabyndy búlingeni baıqalsa, qaıta qalpyna keltiriledi. Bul oryndardyń aınalasyndaǵy eldi mekenderdiń maly qazirdiń ózinde sibir jarasyna qarsy egilip jatyr.
Bıylǵy sý tasqyny kezinde de myńdaǵan mal shyǵynǵa ushyrady. Oblysta aldyn-ala málimet boıynsha sý tasqyny saldarynan 219 bas iri qara, 1 552 qoı-eshki, 54 jylqy, 97 shoshqa jáne 119 úı qusy ólgen. Aýdandarda qurylǵan arnaıy komıssııalar mal shyǵynyn áli eseptep jatyr. Sebebi keıbir eldi mekender áli sýda tur, keıbirine jol qatynasy úzilgen.
Qazir mamandar sý tasqynynan ólgen maldy veterınarııalyq-sanıtarııalyq talaptar boıynsha joıýǵa kiristi. Jaǵdaı baqylaýda.
Oblys aýmaǵynda birqatar eldi mekendi sý basýy saldarynan 2 351 bas iri qara, 2 482 qoı-eshki, 52 bas jylqy jáne 1 túıe qaýipsiz aýmaqqa kóshirildi.
Batys Qazaqstan oblysy