Batys Qazaqstan oblysynda tasqyn sý ábigeri bastalǵaly óńirdegi Qazaqstan halqy Assambleıasyna qarasty «Dostyq úıi» de qarbalas qımylǵa kóshken. Bir bólme tasqyn sýdan zardap shegýshilerge arnalǵan gýmanıtarlyq kómek jınaıtyn qoımaǵa aınalypty. Munda qazir «Júrekten – júrekke!» atty aksııa ótip jatyr.
Munda jumys barynsha júıege qoıylǵan. Shtabtyń 15 múshesiniń árqaısysy ózine tıesili mindetin bólisip alyp, shapqylap júr. О́ńirde eń alǵash tasqyn sýdan Terekti aýdanyndaǵy Ańqaty aýyly men Qaratóbe aýdanyndaǵy Aqqozy aýyldary zardap shekti. Ile-shala Dostyq úıinde Assambleıa jastarynyń bastamasymen tasqynnan zardap shekken turǵyndarǵa gýmanıtarlyq kómek kórsetý úshin qabyldaý pýnkti ashylǵan.
«Qıyn jaǵdaıǵa dýshar bolǵan jerlesterimizge gýmanıtarlyq kómek kórsetý bastamasyn etnomádenı birlestikter, aqsaqaldar jáne analar keńesteri, óńirimizge belgili kásipkerler, iri kompanııalar, qoǵamdyq uıymdar jáne qala turǵyndary birden qoldap ketti», deıdi «Qoǵamdyq kelisim» mekemesiniń basshysy Aıgúl Túrkına. Onyń aıtýynsha, shtab quramyndaǵy Talǵat Chýdobaevtyń qaıyrymdylyq aksııalaryn uıymdastyrýda ondaǵan jyldyq tájirıbesi bar.
«Shtabta gýmanıtarlyq kómekti qabyldaý jáne uıymdastyrý jumysy úshin «Respublica» partııasynyń BQOF resmı ókili Dýlat Maqatov jaýapty. Assambleıa janyndaǵy «Birlik» ázerbaıjan etno-mádenı birlestigi tóraǵasynyń orynbasary, BQO QHA Eriktiler qozǵalysy ortalyǵynyń jetekshisi Elgýn Djanalıev negizinen kómekti jınaý jáne jetkizýdiń logıstıkasymen aınalysyp jatyr. Al kelgen kómektiń esebin júrgizý jáne maqsatty bólý isin óńirlik «Assambleıa jastary» tóraǵa orynbasary Saıasat Jarasov moınyna alǵan», deıdi Aıgúl Serikqyzy.
Shtab tabıǵı apattan zardap shekkenderge kómek kórsetý jumysyn utymdy uıymdastyrý úshin oblys ákimi N.Tóreǵalıev, oblys ákiminiń orynbasary B.Narymbetov, oblystyq tótenshe jaǵdaılar departamenti jáne barlyq memlekettik uıymmen tyǵyz baılanysta jumys istep otyr. «Barlyq oblystaǵy shtab koordınatorlarymen óte tyǵyz baılanystamyz. Sonyń arqasynda qaıda qandaı taýar bar, bizge qashan keledi degen suraqtardyń naqty jaýabyn bilip otyramyz. Bul bizge óte jaqsy kómektesip otyr», deıdi shtab bastyǵy.
Shtab árıne, eń aldymen, tasqynnan zardap shegýshiler ornalasqan evakýasııalyq bekettermen turaqty baılanys jasap, jaǵdaıdy baqylap otyr. О́ńirdegi «Ulttyq volonterlik jeli» uıymy, «Biz birgemiz Qazaqstan» qaıyrymdylyq qory, «Amanat» partııasy, «Respublica» partııasy BQOF, Jastar resýrstyq ortalyǵy, Azamattyq alıans sııaqty uıymdardyń jastary, eriktiler – bári kúsh biriktirgende, alynbas asý qalmaǵan. El basyna kún týǵan kezde eńbektegen baladan eńkeıgen kárige deıin ıgi iske atsalysa ketkeni kóńilge qýanysh uıalatady.
«Qabyldaý pýnktimiz ashylǵan sátte «Sun City» qurylys kompanııasy, «Respublica» partııasy, «Bırlık» ázerbaıjan etno-mádenı birlestigi, «Beles» kompanııasy, jeke kásipker Azat Rashıdov kelip, kómek qolyn sozdy. Odan keıin BQO Isker áıelder qoǵamdyq birlestigi, «Otdel stroı» kompanııasy, «Elıon» stomatologııa emhanasy, «New tex» belorýs ortalyǵy, «Jelaev» nan kombınaty, «Qazaq analary Dástúrge jol» BQO fılıaly, «Tarıhı shejire» respýblıkalyq uıymy, «Artstroy Servis 07» kompanııasy, «Faberlic» kompanııasy jalǵastyryp, zor úles qosty. Qala turǵyndarynyń belsendiligi de erekshe. Qabyldaý pýnkti ashylǵan kúnnen tolassyz kelip jatyr. Kún saıyn sý tasqynynan zardap shekkenderge qandaı kómek qajet ekenin surap kóp adam habarlasady. Osyndaıda «El ekenbiz!» dep eńseń kóteriledi», deıdi Aıgúl Serikqyzy.
Shtab jumysyn bastaǵaly 28 naýryz ben 8 sáýir aralyǵynda jınalǵan gýmanıtarlyq kómektiń jalpy quny 54 mln teńgege jýyqtap qalypty. Bul – azyq-túlik, jemis pen kókónis, dári-dármek, sanıtarlyq-gıgıenalyq quraldar, kıim-keshek, turmystyq zattar, qurylys jáne basqa da taýarlar. Bul kómek Syrym, Qaratóbe, Bórli, Terekti jáne Báıterek aýdandaryna birneshe qaıtara jóneltilgen.
Budan bólek, Assambleıanyń «Júrekten – júrekke!» arnaıy jobasy aıasynda BQO QHA Eriktiler qozǵalysy, Assambleıa jastary, «Dostyq úıiniń» qyzmetkerleri de kómegin bir kún toqtatqan emes. Qoǵamdyq damý basqarmasynyń «Qoǵamdyq kelisim» ujymy qyzmetkerleri bir kúndik jalaqysyn aýdardy.
Aıgúl Serikqyzy oblystyq kásipkerlik jáne ındýstrııalyq-ınnovasııalyq damý basqarmasynyń ujymyna, jeke kásipker Erbolat Keńesovke, tatar mádenı ortalyǵyna, «Vaınah» sheshen-ıngýsh qoǵamyna, onyń tóraǵasy Danılbek Saratovqa, BQO QHA Analar keńesiniń tóraıymy Shalqyma Qurmanalınaǵa, keńes múshesi Kúlásh Ahmetovaǵa erekshe rıza.
«Asar-Ume» qaıyrymdylyq qorynyń negizin qalaýshy Ashat Nýrmashev jalpy esebi 9,5 mln teńge kóleminde qarjylaı kómek kórsetkenin erekshe atap ótkimiz keledi. Bul qarajatqa 10 motorly qaıyq pen 60 arnaıy shlemi bar kombınezon, 5 motosorǵy jáne 5 generator, rezeńke etikter satyp aldyq. «Invest Prodjekt» JShS sábılerge arnalǵan sanıtarlyq-gıgıenalyq zattar, «Oral sút zaýyty» 20 qorap sút ónimderi men 7 jup rezeńke etik, «Sýleımenova» JK kıim-keshek, aıaqkıimder, sábı jórgekterin, «SBS GRUP» JK 6 paket jańa kıim-keshek, «Otdel stroı Arýova» 4 paket aıaqkıim, kıim jetkizdi. Sý tasqynyna baılanysty ashylǵan «Aqjaıyq» jeke qoryna «Petro-Unit», «Salut Orto KZ» JShS, «Haımat» Oral nemis mádenı-aǵartý qoǵamy» QB tóraǵasy Gennadıı Franktiń qoldaýymen 600 myń teńge qarjy aýdaryldy. «Masıs» armıan etnomádenı birlestigi jalpy somasy 2 700 000 teńgeni quraıtyn kómek kórsetti. Oral qalalyq «Medet Oral» qoǵamdyq qory 700 000 teńge kóleminde azyq-túlikpen kómektesti. Atyraý qalasynan «AVC Group» kompanııasy 4 500 000 teńge kóleminde materıaldyq kómegin tabystady. Bulardyń bárin atap shyǵý múmkin emes», deıdi Aıgúl Serikqyzy.
«Tońǵan jannyń arqasyna shapan japsań, jylýy seni de jylytady» degen ǵoı. Eldiń yqylas-meıirin óz qolynan, óz júreginen ótkizip júrgen Assambleıa músheleri, gýmanıtarlyq shtab qyzmetkerleri kúni-túni qyzmet jasap júrse de elgezek qalpynan tanbaǵan, sharshamaǵan. Mine, taǵy da asyǵys attanyp barady. О́ıtkeni olardy kútken el bar. Tilsiz jaý – tasqyn áli báseńdemeı tur.
Batys Qazaqstan oblysy