Memleket basshysy Qasym-Jomart Toqaevtyń «Taza Qazaqstan» ekologııalyq aksııasy bastamasyn Túrkistan oblysynyń tabıǵat janashyrlary qýanyshpen qabyldap, jumysty bastap ketti.
«Belsendi demalys» saıabaǵyna aǵash otyrǵyzyp, aksııaǵa qoldaý bildirgen oblys ákimi Darhan Satybaldy jastarmen júzdesip, pikir almasty. Otanshyldyq – tazalyqtan bastalatynyn aıtyp, aǵash egip, týǵan jerdiń tazalyǵyn saqtaý, tabıǵatyn qorǵaý árbir adamnyń mindeti ekenin jetkizdi. Memleket basshysynyń tapsyrmasy aıasynda 2021-2025 jyldar aralyǵynda óńirdegi 800-den astam eldi mekendi kógaldandyrý úshin 4 mıllıonnan astam kóshet egý kózdelgen. Bıyldyń ózinde mıllıonnan astam kóshet egiledi.
«Kóshesiniń tazalyǵyna qarap, azamatyn, halqyn tanısyń. «Taza ólke – Túrkistan» aksııasy sheńberinde ótken aptadan beri aýdan, qalalarda tazalyq, kógaldandyrý jumystary bastalyp ketti. Bul – bir aılyq naýqan emes. Maqsatymyz – tazalyq saqtaý, aǵash, gúl egýdi ómirlik daǵdyǵa aınaldyrý. Osy salaǵa jaýapty basqarmalarǵa, aýdan, qala ákimderine, kommýnaldyq mekemelerge naqty tapsyrmalar berildi. Arnaıy tehnıkalar, resýrstar bólindi. Taýlar da, ormandar da, ózen-kólder de, baıtaq dala da, aýyldar da, qalalar da – bizdiki. Osy baılyǵymyzǵa janashyrlyqpen qaraıyq! Barsha Túrkistan óńiriniń turǵyndaryn osy aksııany qoldaýǵa shaqyramyn! Birlik pen eńbektiń arqasynda Túrkistanymyzdy jasyl aımaqqa aınaldyraıyq!», dedi oblys ákimi Darhan Satybaldy.
«Taza ólke» aksııasy bastalǵaly beri oblysta 1500 kóshe jáne 33 myńnan astam aıaqjol tazalanyp, 850 tonna qoqys shyǵaryldy. Sondaı-aq 140 myńnan astam aǵash áktelip, 138 myńǵa jýyq kóshet otyrǵyzyldy. Budan bólek 275 saıabaq jáne skver, 192 dana balalar jáne sport alańshalary tazalandy. Bul is-sharalarǵa 279 tehnıka jáne 15 myńnan astam adam qatysty. Osylaısha kúni keshe 10 sáýir men 11 mamyr aralyǵynda ótetin «Taza ólke – Túrkistan» naýqany bastaldy. Ár aptaǵa arnaıy at berilip, túrli baǵytta ekologııalyq is-sharalar uıymdastyrylatyn bolady.
TÚRKISTAN