2021-2025 jyldarǵa arnalǵan agroónerkásip keshendi damytý jónindegi ulttyq joba sheńberinde Jambyl oblysyna qomaqty qarjy bólingen bolatyn. 11 myńnan astam aýyl sharýashylyǵy taýaryn óndirýshiler shamamen 30,6 mlrd. teńge qarjyǵa ıe boldy. Alaıda, senator Sáken Arýbaev aýyl sharýashylyǵy salasyn damytý úshin atalǵan qarajat jetkiliksiz josparlanǵanyn atap ótti, dep habarlaıdy Egemen.kz Senattyń baspasóz qyzmetine silteme jasap.
Senat depýtatynyń aıtýynsha, mysaly, 9,8 myń ga alqapta qant qyzylshasyn óndirýge 8,6 mlrd teńge qajet bolatyn, alaıda 2 mlrd teńge ǵana bólindi. Sondaı-aq egis alqaptaryn ulǵaıtýǵa qajetti mıneraldy tyńaıtqyshtarǵa sýbsıdııa berilmegen.
«Negizgi máselelerdiń biri – ózdiginen júretin dońǵalaqty traktorlar men kombaındardyń jańarý kórsetkishin 10,0 paıyzǵa deıin jetkizý. Al, sharýalardyń óz qarajaty esebinen tehnıkany satyp alýǵa múmkinshiligi tómen. Búgingi kúnge, tehnıkany jáne tehnologııalyq jabdyqty satyp alýǵa nesıe berý, sondaı-aq, lızıng kezinde syıaqy mólsherlemesin sýbsıdııalaý baǵdarlamasy sheńberinde bastapqy avanstyq tólem júrgizý arqyly óz sheshimin taýyp otyr. Degenmen, buǵan deıin jasalǵan sharttar boıynsha sýbsıdııalar sýmmasy men aldaǵy qarastyrylatyn jobalarǵa avanstyq tólemder ótelgen jaǵdaıda ǵana qosymsha 100 birlik ártúrli tehnıkamen qamtýǵa múmkindik bar. Biraq bul sheshilmegen máselelerdiń qatarynda qalyp otyr», dedi senator depýtattyq saýalynda.
Senator atalǵan óńirdiń mal sharýashylyǵy salasynda da jaǵdaı kúrdeli ekenin atap ótti, damytýǵa 5,3 mlrd teńge bólinse de ótken jyldan qalǵan rezervtik ótinimderdiń qaryz somasy 2,6 mlrd teńgeni quraǵan. Bul mal sharýashylyǵynyń budan bylaıǵy damýyna qaýip tóndirip otyr.
«Osyǵan baılanysty, Memleket basshysynyń tapsyrmasyn is júzinde oryndaý maqsatynda, Jambyl oblysynyń agroónerkásiptik kesheniniń 2023 jyldan qalǵan qaryzdaryn óteýge jáne 2024 jylǵa qoldaý kórsetý úshin tıisti qarjy qajettiligin qarastyrý kerektigin, sondaı-aq respýblıkamyzdyń barlyq óńirlerinde de atalǵan másele ózekti ekendigin jetkize otyryp, barlyq baǵyttar boıynsha tıisti zerdeleý jumystaryn júrgizip, naqty sharalar qabyldaý kerek», dedi Sáken Arýbaev.