Qazaqstan Respýblıkasynyń Prezıdenti Qasym-Jomart Toqaev «Armenpress» aqparat agenttigine suhbat berdi. Áńgime barysynda Memleket basshysyna «Álemniń ár bóliginde joǵary, keıde qaıǵyly, týrbýlenttik baıqalatyn qazirgi jaǵdaıda halyqaralyq qatynastarda aýmaqtyq tutastyq, shekaralar men egemendiktiń myzǵymastyǵy qaǵıdattaryn ustaný, sondaı-aq alynǵan mindettemeler men qol jetkizilgen ýaǵdalastyqtardyń saqtalýyn qamtamasyz etý qanshalyqty mańyzdy?» degen suraq qoıyldy, dep habarlaıdy Egemen.kz.
Prezıdent qazirgi zamanǵy halyqaralyq quqyq betpe-bet keletin problemalar týraly óz ustanymyn birneshe ret aıtqanyn tilge tıek ete kele, Qazaqstan BUU Jarǵysynda kórinis tapqan halyqaralyq quqyq normalary men qaǵıdattaryna óziniń prınsıpti adaldyǵyn únemi saqtaıtynyn, bul turǵyda BUU-nyń halyqaralyq isterdegi jáne beıbitshilik pen turaqtylyqty saqtaýdaǵy ortalyq róli Qazaqstan úshin balamasyz kúıinde qalyp otyrǵanyn atap ótti.
«Jahandyq qaýipsizdiktiń qazirgi zamanǵy arhıtektýrasy teńdessiz syn-qaterlerge tap bolyp otyr. О́sip kele jatqan buǵattylyq, geosaıası fragmentteý jáne halyqaralyq quqyq qaǵıdattarynyń buzylýy halyqaralyq ınstıtýttardyń róli men bedeline nuqsan keltire otyryp, senimsizdik daǵdarysyn kúsheıtedi. Negizgi kópjaqty kelisimderdi saqtamaý, toqtata turý jáne odan shyǵý praktıkasy asa alańdaýshylyq týǵyzady, óıtkeni ol qaıtymsyz saldarlarǵa ákep soǵýy múmkin. Ár adam beıbitshilikke qol jetkizý jolyn óz betinshe qabyldaǵanda jáne basqalardyń múddesine qaramaı, óz beıbitshilik úlgisin alǵa jyljytqanda, bul shıelenis kózine aınalady», dedi Q.Toqaev.
Memleket basshysy Qasym-Jomart Toqaevtyń aıtýynsha, osyǵan baılanysty kez kelgen qaıshylyqtardy, onyń ishinde memleketterdiń aýmaqtyq tutastyǵyna qatysty qaıshylyqtardy BUU Jarǵysynyń normalary men qaǵıdattaryna sáıkes saıası-dıplomatııalyq dıalog arqyly ǵana sheshý qajet. BUU sheńberinde bekitilgen qundylyqtar júıesi álemdegi qaýipsizdik pen turaqtylyqty qamtamasyz etý úshin baǵdar bolyp qalýǵa tıis.
«Qazaqstan halyqaralyq isterde ádilettilikke, beıbitshilikke, yntymaqtastyqqa jáne memleketterdiń teń quqyqtylyǵyna negizdelgen sheshimderge degen ortaq umtylysyn bólisedi. Osy turǵyda biz «Ádil beıbitshilik pen kelisim úshin álemdik birlik týraly» bastamany ilgeriletip kelemiz jáne barlyq seriktesterimizdiń qoldaýyna senemiz.Qazirgi kezeńde tek qana memleketterdiń ujymdyq kúsh-jigeri, dana, joǵary kásibı dıplomatııa álemdegi uzaq merzimdi turaqtylyqqa jáne jalpyǵa ortaq progreske, BUU Jarǵysy negizinde halyqaralyq qatynastardyń ádil júıesin qurýǵa alyp keletinine senimdimin», dedi QR Prezıdenti.