15 sáýirden bastap Batys Qazaqstan oblysynda 4 aýdan men Oral qalasyndaǵy mektepter qashyqtan oqytýǵa kóshedi.
«О́ńirdegi tótenshe jaǵdaı ýaqytynda balalardyń qaýipsizdigin qamtamasyz etý maqsatynda Jaıyq ózeniniń jaǵalaýynda ornalasqan Aqjaıyq, Bórli, Báıterek, Terekti aýdandarynyń jáne Oral qalasynyń orta bilim berý, kásiptik-tehnıkalyq jáne qosymsha bilim berý uıymdary 15 sáýirden bastap oqý prosesin tıisti platformalar arqyly qashyqtan uıymdastyrady», delingen oblystyq bilim basqarmasy taratqan baspasóz habarynda.
Qazir bilim berý uıymdarynyń basshylary oqýshylardyń tehnıkalyq oqytý quraladyrmen qamtý jumysyn uıymdastyryp jatyr.
Aıta keteıik, Jaıyq ózeniniń joǵary bastaýynan kele jatqan mol sý 17-sáýirde Batys Qazaqstan oblysynyń aýmaǵyna jetedi deıdi mamandar. Qazir sýǵa ketýi múmkin eldi mekender men saıajaı aýmaǵynan turǵyndar kóshirilip, Oral qalasynyń qorǵanys bógenderi nyǵaıtylyp jatyr.
Bıyl sý tasqyny bastalǵaly óńirde barlyǵy 1226 turǵyn úı men 1 905 saıajaı úıi sý astynda qaldy. 13 159 adam qaýipsiz jerge kóshirildi, onyń ishinde 5 506-sy – bala. Qazir oblys boıynsha 17 evakýasııalyq pýnktke 1701 adam jetkizildi. Olarǵa qajetti zattar men azyq-túlik ýaqtyly jetkiziledi.
Oral qalasy ákiminiń orynbasary Jandos Dúısenǵalıevtiń aıtýynsha, oblys ortalyǵynyń mańynda 25 myńdaı halyq saıajaı, baý-baqsha seriktestikterinde turyp jatyr.
Búginge deıin Oral qalasy boıynsha 1532 saıajaı sýǵa ketti. Sondaı-aq Bórli aýdanynda – 245, Báıterek aýdanynda – 112, Terekti aýdanynda – 16 saıajaı úıin sý basqany tirkelgen.
Budan buryn habarlaǵanymyzdaı, Batys Qazaqstan oblysyna elimizdiń ár óńirinen gýmanıtarlyq kómek te, adamdar men tehnıka da úzdiksiz kelip jatyr. Sáýirdiń 14-i kúni Aqtóbe oblysynan – 50, Túrkistan oblysynan – 49 arnaıy tehnıka kelip jetti.
«Aqtóbe oblysynyń ákimi Ashat Shaharovtyń arnaıy tapsyrmasymen búgin 50 arnaıy tehnıka - «KamAZ» júk kólikteri, topyraq qazýǵa, tıeýge arnalǵan túrli aýyr tehnıka jetkizdik. Búgin-erteń 20 shaqty arnaıy tehnıka taǵy keledi. Bul Aqtóbe oblysyndaǵy mekeme-kásiporyndar men kásipkerlerden jınalǵan. Bulardyń barlyǵy sý tasqyny qaýpi seıilgenshe osy aımaqta bolady», deıdi Aqtóbe oblysy ákimi apparaty basshysynyń orynbasary Qanybek Jaqsyǵalıev.
«Qazir oblys sý tasqynynyń ekinshi kezeńine daıyndalyp jatyr. Jaǵdaı áli de kúrdeli. Sebebi, Reseıdiń Orynbor oblysynan kele jatqan sý 17-19 sáýirde oblysqa jetedi degen boljam bar. Búgin Jaıyq ózenindegi sý deńgeıi 759 sm boldy. Iаǵnı, qaýipti deńgeıge jetip qaldy. Sý deńgeıi 850 sm bolsa, Jaıyq arnasynan asady. Sondyqtan ózen boıyna 80 shaqyrymǵa jýyq bóget turǵyzylyp, Jaıyq ózeniniń jaǵasy barynsha nyǵaıtylyp jatyr. Qazirgi ýaqytta Aqjaıyq, Bórli, Báıterek, Terekti aýdandary men Oral qalasyn sý basý qaýpi bar», dedi BQO ákimi baspasóz qyzmetiniń basshysy Erhan Tátken.
О́ńirde sý tasqynynan zardap shekken azamattarǵa jan-jaqty kómek kórsetilip jatyr. Jergilikti bıýdjet esebinen 677 otbasyǵa birjolǵy áleýmettik kómek retinde 125 mln teńge qarjy tólengen.
«Bul jumys jalǵasady», deıdi Erhan Tatken.
Batys Qazaqstan oblysy