Ol úsh jarym jylǵa bas bostandyǵynan aıyryldy, dep habarlaıdy Egemen.kz.
Qostanaı oblysy Qamysty aýdandyq sotynda jymqyrý, ıaǵnı senip tapsyrylǵan bótenniń múlkin qyzmettik erejeni paıdalana otyryp, iri mólsherde urlaǵany úshin kináli dep tanylǵan T.-ǵa qatysty qylmystyq is qaraldy (QK 189-baby 3-bóligi 1-tarmaǵy).
Sotta 2022 jylǵy 1 maýsym men 2023 jylǵy 16 tamyz aralyǵynda T. óziniń qyzmettik jaǵdaıyn paıdalana otyryp (býhgalter-kassır) kásiporyn kassasynan 8 600 000 teńgedan astam somada qolma-qol aqsha qarajatyn alyp, jeke qajettilikterine jumsaǵany anyqtaldy.
Sot otyrysynda T. óziniń kinásin tolyq moıyndady, jasaǵan isine ókinish bildirdi.
Sot jaryssózderinde memlekettik aıyptaýshy T.-ǵa 3 jyl 6 aı merzimge bas bostandyǵyn shekteý túrindegi jazany taǵaıyndaýdy, uıymdarda 4 jyl merzimge býhgalterlik esepti oryndaýǵa baılanysty laýazymdardy atqarý quqyǵynan aıyrýdy surady.
Onyń qylmystyq quqyq buzýshylyq jasaýdaǵy kinási óziniń moıyndaý aıǵaqtarynan basqa, kýágerlerdiń aıǵaqtarymen, saraptama qorytyndysymen jáne istiń basqa materıaldarymen rastaldy.
Sot T.-nyń shyn júrekten ókiný men jas balalardyń bolýyn qylmystyq jaýapkershiligi men jazasyn jeńildetetin jaǵdaılar retinde tanydy.
Is boıynsha qylmystyq jaýaptylyq pen jazany aýyrlatatyn mán-jaılar belgilenbegen.
Jeke basyn, jasalǵan is-árekettiń sıpatyn jáne qoǵamdyq qaýiptilik dárejesin, bas bostandyǵyn shekteý túrinde jaza taǵaıyndaýdy suraǵan jábirlenýshiniń pozısııasyn eskere otyryp, sot T.-ǵa probasııalyq baqylaý belgilep 3 jyl 6 aı merzimge bas bostandyǵyn shekteý, 4 jyl merzimge uıymdarda býhgalterlik esep pen kassır laýazymdaryn oryndaýǵa baılanysty laýazymdardy atqarý quqyǵynan aıyrý túrindegi jazany taǵaıyndady.
Zalaldy ishinara óteýdi eskere otyryp, azamattyq talap tolyq kólemde qanaǵattandyryldy.
Úkim zańdy kúshine engen joq.