Baspasóz betterinde jarııalanǵan derekterge qaraǵanda, Atyraýdan Aqtaýǵa ushaqpen jetkisi kelgen jolaýshylar bir bılet úshin 170 780 teńge tóleýge májbúr boldy. Al Atyraýdan Almatyǵa deıingi bılet baǵasy 675 myń teńgege deıin kóterilgen. Almaty, Astana qalalarynan osy óńirlerge qatynaıtyn áýe reısteriniń de baǵasy sharyqtap ketken. Jol qatynasy baǵasynyń kúrt qymbattaýy jáne áýe, temir jol kólikteriniń azdyǵy tasqyn sý basqan oblystardan basqa óńirlerge ketýge qıyndyq týǵyzyp otyr. Osyndaı ózekti máselelerdi qozǵaǵan Edil Jańbyrshın Premer-mınıstrdiń atyna depýtattyq saýal joldady, dep jazady Egemen.kz.
Depýtattyń aıtýynsha, máselege el Prezıdenti aralasyp, áýe jáne temir jol bıletteri baǵasynyń ósýine jol bermeý jóninde qatań eskertti. Osyǵan oraı «Qazaqstan temir joly» kompanııasy ózderine qarasty «Jolaýshylar tasymaly» AQ poıyzdarynyń bıletteri qymbattamaıtynyn habarlady. Qazaq Air áýe kompanııasy elimizdiń birqatar óńirlerindegi sý tasqynyna baılanysty turaqsyz jaǵdaıdy eskere otyryp, áýe bıletteriniń joǵarǵy qunyn bir baǵytqa 40 000 teńgege deıin arzandatty. Kompanııa bul ýaqytsha tarıfpen eldegi sý tasqynynan zardap shekken barlyq óńirlerdiń baǵyttarynda 24 sáýirge deıin áreket etetinin málimdedi.
«Al elimizdegi eń iri áýe kompanııasy – Air Astana toby 9-18 sáýir aralyǵynda Atyraýdan Almaty, Astana, Aqtaý jáne Shymkent qalalaryna 33 qosymsha reıs uıymdastyrylǵanyn málimdeýmen ǵana shekteldi. Áýe qatynasy boıynsha ishki reıster baǵasynyń tym qymbattaýy buǵan deıin de birneshe ret kóterildi. Biraq túbegeıli ózgeristi kórip otyrǵan joqpyz. Sońǵy jaǵdaılarǵa baılanysty baǵanyń odan ári sharyqtaýy, shekten shyǵýshylyq dep bilemiz. Ushatyn kún jaqyndaǵanda bılet baǵasyn ádeıi ósirý – naǵyz qııanat. Kúni keshe Májilis depýtaty Samat Musabaevtyń Kólik mınıstrine áleýmettik jeli arqyly joldaǵan talaby múldem jaýapsyz qaldy. Nege jaýap joq? Álde mınıstrdiń áýe kompanııalaryna bıligi júrmeı me? Eldegi kólik salasy tek qaýipsiz jáne sapaly bolyp qana qoımaı, kópshilikke qoljetimdi bolýy kerek. Osyny kólik kompanııalarynan talap etý qajet», dedi depýtat.
Májilismenniń aıtýynsha, zat baǵasy da qyryq qubylyp tur. Halyq tasqynǵa qarsy judyryqtaı jumylyp jatqanda keıbir alyp-satarlar qara basynyń qamyn kúıittep júr. Quny 50 teńge turatyn qapshyqtyń baǵasyn 200-300 teńgege deıin ósirip, asyra paıda taýyp jatqandar az emes. Osyndaı kúrdeli kezeńde baǵa turaqtylyǵyn, ásirese, tasqynǵa qarsy qoldanylatyn jabdyqtardyń jáne qurylys materıaldarynyń baǵasyn ustaý - memlekettiń basty mindeti.
Depýtattyq saýalynda Edil Jańbyrshın taǵy bir asa mańyzdy máseleni kóterdi. Onyń sózinshe, topannyń saldary óńirlerde kúrdeli sanıtarlyq-epıdemıologııalyq jáne ekologııalyq apattarǵa alyp kelýi múmkin. Muny sarapshylar da, turǵyndar da aıtyp, dabyl qaǵyp otyr. Sý tasqyny zırattardy, qatty-turmystyq qaldyqtardy, mal ólekseleri kómilgen oryndardy, daladaǵy dárethanalardy, janar-jaǵarmaı stansııalaryn da shaıyp ótti. Tipti, zıratta jerlengen adam súıegi de syrtqa shyǵyp ketken jaǵdaılar anyqtaldy.
Depýtattyń pikirinshe, Úkimet kelesi máselelerdi shuǵyl túrde sheshý qajet:
Elimizdegi áýe, temir jol, avtomobıl kólikteri tasymaldaýshylarynyń baǵalary turaqty baqylaýǵa alynyp, onyń negizsiz kóterilýine jol berilmesin. Ásirese, topan sýdan zardap shekken óńirlerdi jalǵaıtyn kólik qatynasyna erekshe nazar aýdarý mańyzdy. Áýe qatynastary tarıfteriniń óspeýin tek 24 sáýirge deıin ustap turmaı, odan keıin de bılet baǵasynyń jyl on eki aı turaqty bolý máselesi qarastyrylsyn. Tasqyn bolǵan óńirdegi áleýmettik mańyzy bar azyq-túlik, janar-jaǵarmaı, qural-saıman, qurylys materıaldarynyń jáne taǵy basqa taýar túrleriniń baǵasyn turaqtandyrýdy qolǵa alý qajet. Qazirden bastap Úkimet tıisti mınıstrlikter men vedomstvolarmen birigip, juqpaly aýrýlarǵa qarsy jedel keshendi sharalar qabyldasyn.Májilismen depýtattyq saýalyn: «Bul apat kózge kórinbeı, ishte jasyryn jatqan biraz kemshilikterimizdi ashyp jatyr. Aǵyn sý memlekettegi «eski aýrýlarymyzdy» tazalaýǵa da sebepshi bolady degen úmitimiz bar. Osy tótenshe jaǵdaı bárimizge sabaq bolýy tıis. Halqymyzdyń «bir qıyndyqtyń artynda eki jaqsylyq bar» degen dana sózi bar. Jaqsylyq ta, bereke de áreketpen keledi. Sondyqtan halyq pen bılik birge qımyldap, topan sý zardabyn tez arada joıýǵa kúsh salý qajet», dep túıindedi