Qarjy naryǵynda belsendi qyzmetimen kózge túsip, kópshilik qurmetine bólenip júrgen qyz-kelinshek qatary artyp keledi. Solardyń biri de biregeıi – Maııa Myńbaeva. «Frıdom Fınans» AQ, Satý jónindegi atqarýshy dırektory bolyp jumys isteıtin Maııany bul kúnderi ásirese, bank sektorynyń qyr-syryna qanyqqan, naryq tabysy men táýekelin salmaqtaı alatyn salaýatty maman dep nyq senimmen aıta alamyz. 8-naýryz arýlar merekesi qarsańynda Maııa Myńbaeva «Egemen Qazaqstan» basylymyna qyzmeti, iskerlik baǵyttaǵy belsendiligi, otbasy jaǵdaıy týraly suhbat berdi.
– Eń birinshi kezekte qarjy salasyna qalaı keldińiz, qarjy naryǵyna degen qyzyǵýshylyǵyńyz qalaı bastaldy dep suraǵymyz keledi?
– Qyzmettik jolym bankte qarapaıym konsýltant bolyp jumys isteýden bastaldy. О́rshil minezimniń, jumysqa jaýapkershilikpen qaraǵanymnyń jáne oqýǵa degen yntamnyń arqasynda vip-menedjerge deıin óstim. Sóıtip, halyqaralyq ınvestısııalyq kompanııaǵa aýystym. «Freedom Broker»-de 10 jyl jumys istep, qarapaıym ınvestısııalyq konsýltanttan Satý departamentiniń atqarýshy dırektoryna deıin kóterildim. Jalpy, naryqtyń osy túrine degen qyzyǵýshylyǵym oqýǵa degen yntamnan bastaldy, ınvestısııalar salasynda jańa dúnıeler úırenip, óskim keldi.
– Brokerlik kompanııadaǵy uzaq jyldyq eńbek ótilińiz barysynda, talaı qyzyqty da, qıyndyqty da kórgenińiz anyq. Otandyq qarjy, bırja sektory ne túrli kezeńderdi bastan keshirdi. Esińizde erekshe qalǵan qandaı jaǵdaıdy aıtar edińiz?
– Klıenttermen jumys jasaǵanda yńǵaısyz jaǵdaı týyndaıdy. Dese de, esińe kóbine keremet sátterdi alǵyń kelip otyrady. Klıentter qyzmet kórsetý sapasyna jáne óz portfeliniń óskenine kóńilderi tolǵan kezder tamasha áser beredi.
– «Frıdomnan» bólek, basqa qarjy uıymdarynda jumys istedińiz be? Sizdińshe, «Frıdomnyń» basty ereksheligi ne?
– «Frıdomǵa» deıin tek bankterde jumys istedim. Meniń oıymsha, bank – negizgi daǵdyny meńgerý úshin myqty mektep. Onda tártip pen júıeni úırenýge bolady. Sondaı-aq ol jerde vip-klıenttermen jumys jasaýdyń negizgi daǵdylaryn meńgerip shyqtym. Freedom-daǵy jumys maǵan keńirek, erkinirek oılaýǵa múmkindik berdi. Qazirgi ýaqytta men satý departamenti basqarmalarynyń birine jetekshilik etemin. Meniń mindetime komandany basqarý ǵana emes, sondaı-aq komandanyń keremet nátıjelerine qol jetkizý úshin barynsha tıimdi jumys jasaý júıesin qurý kiredi. Men úshin basshy bolý – qyzmetkerlerge kúrdeliligi jaǵynan ártúrli másele boıynsha kómektesý, yntalandyrý, oqytý, tájirıbe jáne bilim almasý, baǵyt-baǵdar berý, olardyń jumysyn jeńildetý, ártúrli jobaǵa qatysý degendi bildiredi. Mine, osylardyń arqasynda avtomattandyrylǵan sheshimder qabyldaýǵa, ár qyzmetker jáne jalpy alǵanda komanda úshin psıholog bolýǵa, departamenttiń múddesin qorǵaýǵa bolady, biraq bıznes kórsetkishter men tártiptiń saqtalýyn talap etý qajet. Táýekelderdi basqarýda eń bastysy – naqty ınvestısııalyq strategııa qurý ári ony saqtaý. Konservatıvti strategııa bolǵanda qor naryǵyndaǵy táýekelder kóbine tym az bolyp jatady. Portfeldi ártaraptandyrý jaıyn da umytpaǵan jón. Biraq klıentter ártúrli, táýekel dárejesi de ártúrli bolyp jatady. Barlyǵy tańdalǵan strategııaǵa baılanysty.
– Otbasylyq jaǵdaıyńyz týraly aıtyp ótseńiz?
– Turmystamyn. Eki balam bar. Joldasym men qansha jyl jumys istep kele jatsam, sonsha jyl qoldap keledi. Meniń oıymsha, joldasyńnyń arqa súıer azamatyń ǵana emes, sondaı-aq qyzmet salasynda da qanat bitirip, qoldaý kórsetýi asa mańyzdy. Jaqyn adamyńnyń «Berilme!», «Qolyńnan keledi!», «Sheshimińe senimdi bol!» degen sııaqty sózder aıtýy naǵyz qoldaý eken.
– 8 naýryz merekesin qalaı atap ótesiz? Bul meıramnyń siz úshin máni men mańyzy qandaı?
– Men úshin 8 naýryz – kóktemniń bastalǵany, tabıǵat ananyń jańarýy, shýaqty kúnder. Merekege daıyndyq, meıram aldyndaǵy qarbalas, gúl ustaǵan, júzderinen qýanyshtyń lebi esip turǵan qyzdardy kórý meni qýantady.
– Merekede sizdi quttyqtaıtyndardyń az bolmaıtyny belgili, al ózińiz ádette kimdi quttyqtaısyz?
– Men tek óz jaqyndarym men týǵandarymdy quttyqtap qoımaımyn. Baılanys jasaıtyn, jumys boıynsha jıi ózara baılanysty bolatyn áriptesterimdi quttyqtaýǵa tyrysamyn. Jumysta biz ómirimizdiń kóp bóligin ótkizemiz. Al áriptestermen, onyń ishinde basqa bólimshelerdiń qyzmetkerlerimen jaqsy qarym-qatynasta bolý – mańyzdy dúnıe. Bıyl men Almaty Satý departamentindegi arýlardyń barlyǵyna shaǵyn syılyqtar ázirlep qoıdym.
– Qazir elimizde qarjy salasynda eńbek etip júrgen áıel azamattardyń iskerligin, belsendiligin qalaı baǵalaısyz?
– Men ártúrli salada jumys isteıtin áıelderdiń qyzmeti men belsendiligin qashanda qoldaımyn. Qarjy sektoryndaǵy áıelderdiń belsendiligine degen qurmetim joǵary, sebebi qarjygerler men brokerler erlerdiń kásibi degen túsinik qalyptasqan. Áıelder elimizdiń ekonomıkasyna óz belsendiligimen zor úlesin erlerden artyq qospasa, kem qospaıdy ári ózderi jumys istep jatqan kompanııalarǵa paıdasyn tıgizedi dep sanaımyn. Áıelder qaýymy qarjy sektorynda úlken jetistikterge jetip jatsa, men úshin asqan qýanysh joq. Sebebi bul saladaǵy erlermen básekelesý jáne otbasyǵa aıaýly ana ári súıikti jar retinde kóńil bólý ońaı jumys emes.
– Raqmet! Isińizge tabys tileımiz!
Áńgimelesken Abaı Aımaǵambet