Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary Jetisý jáne Almaty oblystarynda avtomobıl joldaryn damytý máseleleri boıynsha jumys otyrysyn ótkizdi, dep habarlaıdy Egemen.kz Senattyń baspasóz qyzmetine silteme jasap.
Senator Janbolat Jórgenbaev óz sózinde Memleket basshysy Qasym-Jomart Toqaev kólik jáne logıstıka salasyn damytýǵa erekshe nazar aýdaryp otyrǵanyn atap ótti. Alaıda, elimizdegi joldardyń jaǵdaıy syn kótermeıdi.
«2022 jyly Prezıdent Jetisý oblysyna sapary barysynda Kerbulaq jáne Panfılov aýdandaryndaǵy avtomobıl joldaryn jóndeýge qatysty tapsyrma bergen edi. Alaıda, eki jyldan astam ýaqyttan keıin eshqandaı ózgeris baıqalǵan joq. Aýyl turǵyndary kóteretin ózekti máselelerdiń biri – osy. Sonymen qatar Kegen jáne Raıymbek aýdandaryndaǵy respýblıkalyq mańyzy bar avtomobıl joldaryndaǵy jaǵdaı júrgizýshilerdi alańdatyp otyr. Ol týraly jaqynda áleýmettik jelilerde habarlandy. Salalyq memlekettik organdar bergen aqparatqa qaraǵanda, merdiger kompanııalardyń jaýapsyzdyǵy baıqalyp tur. Osyndaı salǵyrttyqtan óńir turǵyndary zardap shegip jatyr», dedi senator.
Depýtattar aldynda sóz alǵan Almaty oblysy ákiminiń orynbasary Almas Batanov óńirdegi ahýal týraly aıtyp berdi. Ol osy jyly 20,8 mlrd teńge somasyna 214 shaqyrym oblystyq mańyzy bar joldardy jóndeý josparlanǵanyn habarlady. Al oblys ákiminiń orynbasary Áset Qanaǵatov senatorlarǵa óńirde 55 eldi mekende joldar men ishki kóshelerdi jóndeýdi kózdeıtin 29 jobany iske asyrý josparlanyp otyrǵanyn aıtty.
Otyrys barysynda kólik mınıstriniń orynbasary Sátjan Ablalıevtiń, «QazAvtoJol» Basqarma tóraǵasy Darhan Imanashevtiń jáne basqa da múddeli mekemeler ókilderiniń baıandamalary tyńdaldy.