Jasandy ıntellekt kún sanap qarqyndy damyp kele jatqandyqtan salaǵa qatysty ulttyq tujyrymdamanyń bolýy mańyzdy. Jańa dúnıeni jatyrqap emes, kerisinshe jasandy zerdeni jaqsylyqqa jaratyp, jahandyq básekege ilese alýymyz kerek.
Sıfrlyq damý, ınnovasııalar jáne aeroǵarysh ónerkásbi mınıstrliginiń ınnovasııalardy damytý departamentiniń dırektory Darhan Myrzabaevtyń aıtýynsha, 2024-2029 jyldarǵa arnalǵan jasandy ıntellektini damytý tujyrymdamasy qabyldandy.
– Memleket basshysynyń tapsyrmasy boıynsha, 2024 jyldyń sońyna deıin «Samuryq-Qazyna» jáne «Group 42» kompanııalary birlesip sýperkompıýterlerdi iske qosatyn bolady. Sýperkompıýter – jasandy ıntellekt modelderin jasaýǵa qyzmet etedi. Sondaı-aq ol jasandy zerde ónimderin jasaýda ǵylymı, akademııalyq ortaǵa kommersııalyq turǵydan qoljetimdi bolady. Tehnologııalyq ınfraqurylymdy iske qosý elimizdiń Ortalyq Azııadaǵy jasandy ıntellektini damytý salasyndaǵy kóshbasshylyǵyn aıqyndaıdy. Sonymen qatar Májilis depýtattary mınıstrlikpen birlesip, jasandy ıntellekt salasyndaǵy zań jobasyn ázirleıdi, – dedi D.Myrzabaev.
«Ulttyq aqparattyq tehnologııalar» aksıonerlik qoǵamynyń Basqarma tóraǵasy Rostıslav Konıashkınniń aıtýynsha, sýperkompıýterdi iske qosý úshin qajetti ınfraqurylymdar qazirdiń ózinde daıyn tur.
– Sýperkompıýter – bul grafıkalyq karta tehnologııasyna negizdelgen serverlik qýat. Ol «Ulttyq aqparattyq tehnologııalar» derekterdi óńdeý ortalyǵynda ornalastyrylyp, jyl sońyna deıin tolyqtaı iske qosylady. Sondaı-aq biz sýperkompıýterdiń serverlik qýatyn qamtamasyz etý arqyly startaptar men bıznes qaýymdastyqtarǵa qoldaý kórsetýdi josparlap otyrmyz. Ulttyq jasandy ıntellekt platformasy jańa júıelerdi qurýǵa arnalǵan alań retinde usynylady, – dedi ol.
«Oxford Insights» júrgizgen 2023 jylǵa arnalǵan jasandy ıntellektige daıyndyq ındeksine sáıkes, Qazaqstan 193 eldiń arasynda 72-orynǵa turaqtaǵan, sondaı-aq Úndistan men Túrkııadan keıin ońtústik jáne Ortalyq Azııa boıynsha óńirlik reıtıngte 3-orynda tur. «Sıfrlyq úkimetti qoldaý ortalyǵynyń» bas dırektory Rústem Bıǵarıdiń aıtýynsha, 2025 jylǵa qaraı jasandy ıntellekt tehnologııalary ozyq korporatıvtik qosymshalardyń shamamen toqsan paıyzyn qamtamasyz etedi degen boljam bar.
– Elimiz jasandy ıntellekt salasyndaǵy álemdik jarysqa kesheýildetip qosylǵanymen, qazirgi ýaqytta osy saladaǵy túrli jobany qarqyndy túrde júzege asyryp jatyr. Alǵashqy qadamdar densaýlyq saqtaý salasynda jáne «Aqyldy qalalardy» damytýǵa baǵyttalǵan «Sıfrlyq Qazaqstan» memlekettik baǵdarlamasy arqyly jasaldy. Jekelegen is-sharalar «Sıfrlandyrý, ǵylym jáne ınnovasııa esebinen tehnologııalyq serpilis» ulttyq jobasy aıasynda da ótkizildi. Densaýlyq saqtaý salasynda qashyqtan medısınalyq qyzmetterdi, robottyq ádisterdi jáne jasandy ıntellektini engizý boıynsha birneshe jobaǵa qoldaý kórsetiletin bolady, – dedi «Sıfrlyq úkimetti qoldaý ortalyǵynyń» bas dırektory R.Bıǵarı
IDC baǵalaýy boıynsha 2023 jyly jasandy ıntellekt júıelerine jumsalǵan álemdik shyǵyn 154 mıllıard dollardy quraǵan. Bul aldyńǵy jylmen salystyrǵanda 30 paıyzǵa kóp. Al Bloomberg Intelligence málimetterine sáıkes, generatıvti jasandy ıntellekt naryǵy shamamen 50 mıllıard dollar kólemine jetip otyr. 2025 jylǵa qaraı bul kórsetkish 217 mıllıard dollarǵa deıin ósedi. Al 2032 jyldary shyǵyn 1,3 trıllıon dollardan asady degen boljam bar.
Aıta keteıik, Ulttyq aqparattyq tehnologııalar AQ basqarma tóraǵasy Rostıslav Konıashkın jasandy ıntellekt arqyly jasalǵan jumystar boıynsha avtorlyq quqyq retteletinin jáne onyń bári Sıfrlyq damý, ınnovasııalar jáne aeroǵarysh ónerkásibi mınıstrliginiń baqylaýynda bolatynyn aıtty. Sarapshylardyń paıymdaýynsha, jasandy ıntellektiniń qarqyny údegen saıyn damyǵan jáne damýshy elder arasynda alshaqtyq paıda bolady. Sebebi jasandy zerde tehnologııalarynyń damýy ınvestısııalyq kapıtalǵa, myqty kadrlyq áleýetke, zertteý júrgizýge múmkindik beretin damyǵan ınfraqurylymǵa tikeleı táýeldi.