Ustalǵan kelinshekke eki nemese odan da kóp adamǵa qatysty birneshe ret iri kólemde alaıaqtyq jasady degen aıyp taǵyldy, dep habarlaıdy Egemen.kz.
Týragent 2021 jyldyń ortasynan bastap óziniń jeke kásibi arqyly kelisimsharttyq qarym-qatynasta jumys istegen týroperatorlardyń týrpaketterin satýmen aınalysqan.
«2022 jyldyń maýsymynan 2023 jyldyń maýsymyna deıin ol týragenttiń atyn jamylyp, azamattarǵa týrıstik paketter usynǵan. Is júzinde ol Japonııa, BAÁ, Túrkııa, Dýbaı, Egıpet, Taıland, Vetnam jáne basqa elderge barý úshin tólengen aqshany jymqyrǵan», delingen Joǵarǵy Sottyń habarlamasynda.
Jábirlenýshiler týrıstik saparlardyń qunyn aldyn ala tolyq tólegen.
Áıel adam azamattardan jymqyrǵan qarajatty tolyǵymen qaltasyna basqany anyqtaldy. Al jábirlenýshiler is júzinde eshqaıda saıahattaı almaıtynyn, aqshasynan qaǵylǵandaryn tek áýejaıda bilgen.
«Alaıaq tergeý amaldary júrgizilip jatqan kezde taǵy eki azamatty aldap úlgergen, onyń biri - synyptasy», delingen habarlamada.
Onyń qylmystyq áreketi saldarynan 70-ke jýyq jábirlenýshige 78 mıllıon teńgeden astam iri kólemdegi materıaldyq shyǵyn keltirilgen.
Týragenttiń kinási jábirlenýshilerdiń, kýálardyń aıǵaqtarymen, bank shotynan úzindi kóshirmelermen, sondaı-aq basqa da is materıaldarymen dáleldendi.
Jalǵan týragent óz kinásin tolyq moıyndap, zardap shekkenderge ótemaqy tóleýge ýáde berdi.
«Sot aıyptalýshyny týrızm salasyndaǵy qyzmetpen 6 jylǵa aınalysý quqyǵynan aıyra otyryp, 4 jylǵa bas bostandyǵynan aıyrý týraly úkim shyǵardy», delingen habarlamada.
Úkim zańdy kúshine engen joq.