«Taza Qazaqstan: Astana – tazalyq pen tártiptiń úlgisi» aýqymdy ekologııalyq aksııasy ótip jatyr. Bul apta «Móldir bulaq» dep atalady, onyń barysynda sý aıdyndary – ózender men kólderdiń aınalasy qoqystan tazartylady. Ekoaksııa aıasynda GPT neırojelilik chatynyń kómegimen jasalǵan sýretterdiń fotokórmesi ótti. Bul týraly elorda ákimdiginiń resmı saıty habarlady, dep jazady Egemen.kz.
Qonaqtar men qala turǵyndarynyń nazaryna álemdi jasandy ıntellekt kózimen beıneleıtin 50 erekshe sýret – ekologııaǵa jaýapsyz kózqarasty kórsetip qana qoımaı, qorshaǵan ortaǵa qamqorlyq jasaýǵa shaqyrady.
Qazirgi jaǵdaıdy jáne bolashaqty beıneleıtin GPT chatymen jasalǵan kartınalar ártúrli stılde jasalǵan. Jasandy ıntellekt bolashaqty qalaı beıneleıtini qonaqtar men qala turǵyndaryn erekshe qyzyqtyrdy.
Is-shara sheńberinde belgili ekobelsendi Shasalım Shagalımov elorda turǵyndary úshin tabıǵatqa janashyrlyq taqyrybynda dáris oqydy.
«Elimiz úshin ekologııa óte mańyzdy másele. Problemalardyń oń sheshimin qaladaǵy kommýnaldyq qyzmetter ǵana emes, turǵyndar da qoldaýy tıis. Kólik terezesinen laqtyrylǵan nemese arnaıy jáshikke salynbaǵan kishkene qoqystyń ózi ekologııaǵa, joldarǵa, kóshelerge, jalpy qalamyzdyń kelbetine teris áser etetinin umytpaýymyz kerek. Qorshaǵan ortaǵa, tabıǵatqa qurmetpen qaraýǵa, jaqsy ekologııa ult densaýlyǵyna tikeleı áser etetinin este saqtaýǵa shaqyramyn», dedi Sh.Shagalımov.
Esterińizge salaıyq, aýqymdy ekoaksııa aıasynda qalany sanıtarlyq tazartý, nóser jáne aryq jelileri, kóshelerdi, trotýarlardy, kvartalishilik aýmaqtardy, qoǵamdyq keńistikter men aýlalardy tazalaý jumystary júrgizilip jatyr.
Sondaı-aq jasyl jelekterdi kútip-ustaý jáne otyrǵyzý, saýda nysandaryna irgeles aýmaqtardy jınaý, kógaldar men gúlzarlar ornatý, ruqsat etilmegen polıgondardy joıý jáne t.b. jumystar jalǵasyn taýyp otyr.