13 mamyr kúni Astana qalasynyń qylmystyq ister jónindegi mamandandyrylǵan aýdanaralyq sotynda aıyptalýshylar Q.Bıshimbaev pen B.Baıjanov soty jalǵasty. Búgingi sot otyrysynda sýdıa Aıjan Qulbaeva istiń zańdy núktesin qoıý prosesinde alqabılerge qoıylatyn 13 suraqty jarııa etti, dep jazady Egemen.kz.
«Qylmystyq iske qatysty suraqtar qurastyryldy. Bıshimbaevqa Qylmystyq kodekstiń 110-babynyń 2-bóliginiń 1-tarmaǵy (Azaptaý – eskertý) boıynsha aıyp taǵyldy. Birinshi suraq: 2022 jylǵy 16 jeltoqsannan 2023 jylǵy 9 qarashaǵa deıin, 2023 jylǵy naýryz, sáýir, qazan, sondaı-aq 2023 jyldyń jazynda Astana qalasy, Almaty qalasynda jábirlenýshi Núkenovanyń denesine únemi túrli dárejedegi uryp-soǵý arqyly fızıkalyq azap kórsetilgen be, onyń ar-namysy men qadir-qasıetin qorlaý arqyly moraldyq azap shekti me?» degen suraqtarǵa jaýap berý arqyly alqabıler aıyptyń dáleldengenin/dáleldenbegenine aıtady.
Ekinshi suraq: sottalýshy Bıshimbaevtyń bul áreketti jasaǵany dáleldendi me?
Úshinshi suraq: sottalýshy Bıshimbaev osy áreketti jasaǵany úshin kináli me?
Tórtinshi suraq: jábirlenýshi Núkenova sottalýshy Bıshimbaevpen birge turǵan kezden bastap óz betinshe aqsha tabýdy toqtatyp, oǵan qarjylyq táýeldi jaǵdaıda bolǵany dáleldendi me?
Qylmystyq kodekstiń 99-babynyń 2-bóliginiń 5-tarmaǵy (Adam óltirý) boıynsha aıyp taǵyldy. Birinshi másele, is-árekettiń bolǵany dáleldendi me, dálirek aıtsaq, 2023 jyldyń 9 qarashasynda, shamamen Astana qalasy, Dostyq kóshesi, 16p mekenjaıyndaǵy «Baý» meıramhanasynda túski astan keıin Núkenova bas súıek mıynyń jabyq jaraqatynan qaıtys boldy. Onyń ólimine oń jaq mańdaı-jelke, sol jaq qabyrǵa asty aımaǵynda jedel sýbdýraldy gematoma, keıinnen mıshyq badamsha bezderiniń magným tesigine jarylýy dıslokasııa sındromynyń damýy men qyzmetiniń buzylǵany áser etti me? О́limge ortalyq júıke júıesi, júrek qyzmeti men tynys alýdyń toqtaýy tikeleı áser etti me?
Ekinshi suraq, birinshi suraqta kórsetilgen jaǵdaılarǵa jábirlenýshi Núkenovanyń bas aımaǵyna maqsatty túrde birneshe soqqylar berý arqyly sanaly túrde jáne qasaqana ólimge ákelgeni dáleldendi me?
Úshinshi suraq: sottalýshy Bıshimbaevtyń bul áreketti jasaǵany dáleldendi me?
Tórtinshi suraq: sottalýshy Bıshimbaev bul áreketti jasaǵany úshin kináli me?
Besinshi suraq: sottalýshy Bıshimbaevtyń jábirlenýshi Núkenovany sanaly túrde óltirip, ony sanaly túrde fızıkalyq jáne moraldyq azaptaýǵa, aýyr jáne uzaqqa sozylǵan azapqa ushyratyp, Núkenovaǵa kóp mólsherde dene jaraqatyn keltirip, sýsyz, uıqysyz, qorlap, azaptaǵany dáleldendi me?
Altynshy suraq: birinshi suraqta kórsetilgen mán-jaılar boıynsha jábirlenýshi Núkenovanyń basynan qasaqana kóptegen soqqylar alǵany, onyń densaýlyǵyna aýyr zııan keltirgeni, sonyń saldarynan jábirlenýshiniń abaısyzdyǵynan qaıtys bolǵany dáleldendi me? Sottalýshy Bıshimbaevtyń bul áreketti jasaǵany dáleldendi me? Al sottalýshy Bıshimbaev bul áreketine kináli me?
«Baıjanovqa Qylmystyq kodekstiń 432-baby (Qylmysty jasyrý) boıynsha aıyp taǵylyp jatyr. Birinshi másele, is-árekettiń bolǵany dáleldendi me, dálirek aıtsaq, 2023 jyldyń 9 qarashasynda Astana qalasy Dostyq kóshesi, 16p, qylmystyń izin jasyrý maqsatynda shara qoldanyldy, memlekettik mekeme qyzmetkeriniń meıramhanaǵa kirýine jol bermedi, VIP kabınanyń kireberisterin jaýyp tastady, meıramhanany jaýyp, meıramhana qyzmetkerlerin jumystan shyǵardy, beıne jazbalardy óshirdi. Beınebaqylaý kameralarynan, meıramhanadaǵy beınekamerany óshirip, Núkenovanyń telefonyn basqa jaqqa aparyp, meıramhanaǵa birneshe ret áıelderdiń kıimderin ákelgen. Ekinshi suraq: bul áreketti sottalýshy Baıjanovtyń jasaǵany dáleldendi me?», dedi Aıjan Qulbaeva.
Úshinshi suraq: sottalýshy Baıjanov osy áreketti jasaǵany úshin kináli me?
Osy suraqtardy oqyp shyqqanan keıin sýdıa Aıjan Qulbaeva sot pen alqabıler sheshim qabyldaý úshin keńesý bólmesine ketetinin aıtty.
Joǵary Sot Bıshimbaev pen Baıjanovqa úkim shyǵarylatyn ýaqyt qosymsha habarlanatynyn málimdedi.