Keshegi Keńes odaǵy kezinde mal sharýashylyǵyndaǵy tamasha tabysymen aty dúrildep shyqqan, jemisti de jeńisti isterine el súısingen eki márte Eńbek Eri Jazylbek Qýanyshbaev barsha qazaq aıryqsha maqtan tutqan tulǵanyń biri. Shý ózeniniń jaǵasyna deıin jaıylyp jatqan Moıynqumnyń qumdy bel-belesteri men Hantaýynyń oty mol kók shalǵyn, kókoraı bókterinde myńǵyrtyp qarakól qoıyn ósirgen shopan atanyń sońynan ergen shákirtteri, jumysyn jaqsy jalǵastyrǵan izbasarlary da kóp bolǵan.
Solardyń biri – «Aıdarly» keńsharynyń aǵa shopany retinde árqashan kózge túsip, tek bıikten ǵana kóringen Eńbek Eri, marqum Dildash apa Itbasova. Iá, ol shyn eńbek baqytyn qoı baǵýdan jańylmaı tapqan jan edi. Sonyń arqasynda Qazaq KSR Joǵarǵy keńesine eki ret depýtat bolyp saılandy, «Qazaq KSR-niń mal sharýashylyǵyna eńbegi sińgen sheber» atandy.
1983 jyly Moıynqumnyń áıgili «Tulparsaz» jaılaýynda atalǵan er-anamyzdyń 70 jastyq mereıtoıy úlken saltanatpen merekelendi. Bul qatysýshylardyń barlyǵynyń janyna, júregine shýaq-nur quıǵan basqosýǵa moıynqumdyqtarmen qatar, jan-jaqtan júzdegen qadirli qonaq jınalyp, toı ıesine aq nıetterimen aqjarma tilekterin arnaǵan bolatyn. Olardyń ishinde Dildash apanyń qanattas, qatarlastary, Eńbek Erleri, Jambyl (qazirgi Taraz) qalasy túbindegi aýdandarda turatyn Syndybala Ońǵarbaeva, Darıǵa Jantoqova analarymyz da júrgen-di.
Myna sýrette sol mereıtoıdyń bir sáti beınelengen. Atap aıtqanda, dúıim jurttyń arasynda aýdandyq partııa komıtetiniń birinshi hatshysy, osy qumdy óńirdi uzaq ýaqyt basqaryp, onyń ósip-órkendeýine, arshyndap alǵa basýyna úlken úlesin qosqan Aıtekeń, Aıtbaı Nazarbekov Dildash apamyzdy marapattap tur. Janynda – keń-mol pishilgen denesin buryp, jarqyn júzimen qaryndasyna meıirimmen qaraǵan, tershigen mańdaıyn endi-endi ǵana aq betoramalymen súrtken, keýdesinde qos juldyzy jarqyraǵan jaryqtyq Jaz-ata, Jazylbek Qýanyshbaev.
Kezinde «Eńbek er atandyrady» degen maǵynasy zor sóz kóp aıtylatyn. Rasynda, isin óte adal, jumysyn únemi úzdik atqarǵandardy árdaıym tóbemizge kóterip, tórge shyǵaratynbyz. Biraz ýaqyt, negizinen naryqtyq ekonomıkanyń áseri bolar, bul máseleniń máni solǵyn tartyp qalǵandaı edi...
Búginde eńbektiń jasampazdyq kúsh-qýatyna jańasha sıpat berilip, eńbek adamynyń mártebesin bıiktetip, mereıin ósirýge aıryqsha kóńil bólinip otyrǵany qýantady.
Berikbaı QADYQOV,
jýrnalıst