Jezqazǵan qalasynda Parlament Májilisiniń Ekologııa jáne tabıǵatty paıdalaný komıtetiniń kóshpeli otyrysy ótip, Ulytaý oblysynyń ekologııalyq jáne energetıkalyq máselelerin sheshý joldary talqylandy.
Komıtet tóraǵasy Edil Jańbyrshın bastaǵan kóshpeli otyrysqa qatysýshylar oblys ortalyǵy men Sátbaev qalasyndaǵy birqatar nysandy aralap kórdi, jergilikti jerdegi ekologııalyq ahýalmen jete tanysýǵa umtyldy.
Al aımaqtaǵy ekologııalyq jaǵdaı – alańdatarlyq kúıde. Keıingi kezde óńir halqynyń arasynda onkologııalyq aýrýlardyń kóbeıip ketkeni beker bolmasa kerek. Aýanyń lastanýyna qosa aýyzsýdyń sapasy, ásirese Jezqazǵan qalasynda múldem syn kótermeıdi. Jezqazǵandyq qoǵam belsendileri bul máselege bıliktiń nazaryn aýdarý maqsatynda Jezqazǵan, Sátbaev qalalary men Ulytaý aýdanyn «Ekologııalyq apat aımaǵy» dep jarııalaý jóninde usynys bildirgen edi. Osy talaptyń nátıjesinde «Ekoservıs-S» JShS Jezqazǵan-Ulytaý óńirindegi onkologııalyq aýrýlardyń sebepterin zertteýmen aınalysyp jatyr. Bul mekeme zertteý jumystaryn aldaǵy qazan aıynda aıaqtaıdy. О́kinishke qaraı, Jańaarqa aýdanynda mundaı maqsattaǵy zertteý júrgizilip jatqan joq. Bul – jergilikti bıliktiń tarapynan jiberilgen aǵattyq. Áıtpese, Jańaarqa óńirinde de túıindi máseleler jetkilikti. Basqasyn aıtpaǵanda, Jańaarqaǵa bir emes, eki ret zymyran qulap, geptıl tógilgeni belgili. Oblystyń Qarajal qalasy men Jáırem kentiniń turǵyndary halyqqa jetimsizdik týyndap jatqanda «Kazsınk JGOK» zaýytynyń óndiris qajetine aýyzsýdy paıdalanýyna narazylyq bildirip júr. Káriz sýlarynyń ózen, kólderge quıylýy, oblys terrıtorııasyndaǵy sýqoımalarynyń lastanýy jáne basqa máseleler kóshpeli otyrysta jan-jaqty sóz boldy.
Kóshpeli otyrys kezinde Májilis depýtattary, partııalardyń ókilderi, eńbek ardagerleri, qoǵam belsendileri jıynǵa qatysqan Úkimet múshe-lerine, oblys pen iri óndiris basshylaryna ózekti suraqtaryn qoıyp, usynystaryn jetkizdi. Qoǵam belsendileri tarapynan aımaqtaǵy alpaýyt kásiporyn «Qazaqmys» korporasııasy JShS-nyń atyna kóp syn aıtyldy. Olardyń aıtýynsha, aımaqta alańdatarlyq ahýaldyń qalyptasýy – korporasııanyń ekologııalyq talaptardy saqtamaýynyń saldary, «Qazaqmys» óz mindettemelerin oryndaýǵa salǵyrt qaraýy. Bul – bir ǵana mysal. Úkimet 2022 jylǵy 4 qarashada Ulytaý oblysyn áleýmettik-ekonomıkalyq damytýdyń 2022-2026 jyldarǵa arnalǵan keshendi josparyn bekitý týraly №871 qaýly qabyldaǵan edi. Osy qaýlynyń «Jylýmen jabdyqtaý» dep atalatyn bóliginiń 48-tarmaǵynda Sátbaev qalasynda qosymsha 5-qazandyqty ornatyp, №1 jylý stansasyn jańǵyrtýdyń oryndalý merzimi 2024 jyl dep kórsetilgen. Byltyr Sátbaev qalasy qazandyǵynan býdaqtaǵan qara tútin qalany alty aı boıy kúlge kómip tastady. Buǵan eshkim jaýap bergen de emes. 5-qazandyq salý, jańǵyrtý jumystary da júrgizilgen joq. Soǵan qaraǵanda «Qazaqmys» Úkimet bekitken keshendi jospardaǵy ózderine alǵan mindettemelerin esinen shyǵaryp alǵan da bolýy múmkin.
Jıyndy qorytyndylaǵan E.Jańbyrshın belsendilik tanytqan barsha azamatqa alǵysyn aıtyp, kópshiliktiń pikiri aıaqsyz qalmaıtynyna sendirdi.
– Jyldar boıy qordalanyp qalǵan máselelerdi bir demde sheshý múmkin emes, biraq keıinge ysyra berýge de bolmaıdy. Biz muny Jezqazǵan jerinde bolyp eki kúnde kózimizben kórip, janymyzben sezindik. Mys ordasynyń keteýi ketken kúıin kórip, kóńilimiz qulazydy, júregimiz aýyrdy. Sondyqtan múmkindiginshe qoldaý, kómek kórsetý – mindetimiz, – dedi ol.
Ulytaý oblysy