Úkimet jalpy qarjylandyrý somasy 68 mıllıard teńgeden asatyn orman sharýashylyǵy kásiporyndaryn materıaldyq-tehnıkalyq jaraqtandyrýdy nyǵaıtýdyń 2023-2027 jyldarǵa arnalǵan Keshendi josparyn qabyldady. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev málim etti, dep habarlaıdy Egemen.kz.
«О́tken jyly tabıǵatty qorǵaý uıymdary úshin shamamen 9 mlrd teńgege 25 órt sóndirý mashınasy, 51 shaǵyn orman órt sóndirý kesheni, 154 traktor, 73 patrýldik kólik jáne 655 birlik órt sóndirý tehnıkasy (dıskili tyrmalar, soqalar, tirkemeler jáne t.b.) satyp alyndy», dedi Erlan Nysanbaev.
Mınıstrdiń habarlaýynsha, jergilikti atqarýshy organdar jalpy somasy 6,6 mlrd teńgege 20 órt sóndirý mashınasy, 127 traktor jáne 76 patrýldik kólik satyp alǵanyn atap ótti. Sondaı-aq osy ýaqytqa deıin orman sharýashylyǵyn materıaldyq-tehnıkalyq jaraqtandyrýǵa mundaı kólemde qarajat bólinbegenin tilge tıek etti.
«Bıylǵy jazda Semeı ormanynda alapat órt bolǵanyn barshańyz bilesizder. Orman salasynyń 15 qyzmetkeri tilsiz jaýdyń qurbany boldy. Úlken alqapta bolǵan órttiń birden bir sebebi tabıǵatty qorǵaý jáne orman sharýashylyǵy mekemelerin tehnıkamen qamtamasyz etýdiń tómen deńgeıi, atap aıtqanda 70% deńgeıinde ǵana qamtamasyz etilgen. Al qoldanystaǵy tehnıkanyń 60%-dan astamy esepten shyǵarýǵa jatady», dedi mınıstr.
Sonymen qatar ormandy qorǵaý sharalaryn júzege asyrý aıasynda órt qaýpi joǵary orman alqaptarynda órtti erte anyqtaý júıesi ornatylady. Osyǵan baılanysty mınıstrlik orman monıtorıngi men órti erte anyqtaý úshin Ahýaldyq ortalyq qurýdy josparlap otyr.
Qyrmyzy JUMAǴALIQYZY,
EUÝ stýdenti