Atyraý oblysy ákimi Serik Shápkenov Mahambet aýdanyndaǵy Taldykól, Saraıshyq, Mahambet, Sarytoǵaı, Aqjaıyq aýyldyq okrýgterindegi bógetterdi nyǵaıtý jumystaryn tekserip, nópir sýdy eldi mekenderden qaýipsiz ótkizý týraly tapsyrma berdi. Bul týraly oblys ákimdiginiń resmı paraqshasynan málim boldy, dep habarlaıdy Egemen.kz.
Respýblıkalyq mańyzy bar «Atyraý-Oral» tas jolynan (72 km) sý ótkizý týraly sheshim qabyldanyp, aýyr júk kólikteriniń qozǵalysy toqtatylady. Jeńil kólikter oblystyq mańyzy bar «Atyraý-Inder» tas joly boıymen júredi. Aımaq basshysy jumystarmen tanysqan soń aýdan ákimine bóget boıyndaǵy kezekshilikti kúsheıtip, qajetti tehnıkalarmen, janar-jaǵarmaımen jáne azyq-túlikpen qamtýdy tapsyrdy. Mahambet aýdanynda sý tasqynynyń aldyn alý úshin salynǵan bógetterdiń uzyndyǵy – 105,8 km.