Mınıstrdiń tapsyrmasyna sáıkes Túrkistan oblysynyń sharýalary úshin sýarmaly sýdyń baǵasy 38%-ǵa deıin arzandady, dep habarlaıdy Egemen.kz Sý jáne ırrıgasııa mınıstrliginiń baspasóz qyzmetine silteme jasap.
Jyl basynda sý resýrstary jáne ırrıgasııa mınıstri Nurjan Nurjigitov sharýalardyń ótinishin qanaǵattandyrý maqsatynda «Qazsýshar» fılıaldaryna dıhandarmen deldalsyz tikeleı kelisimshartqa otyrý týraly tapsyrma bergen bolatyn. Osynyń nátıjesinde bıyl Túrkistan oblysynyń sharýalary úshin sýarmaly sýdyń baǵasy 38%-ǵa deıin arzandady.
Máselen, osyǵan deıin sor shaıý jumystaryna aǵyn sý quny 1 gektarǵa – 6000-7000 teńge aralyǵynda bolsa, bıyl bekitilgen tarıfi boıynsha qyzmet quny 1 gektarǵa – 4282 teńge. Esepteý nátıjesinde qyzmet quny orta eseppen 28% jáne 38%-ǵa deıin arzandaǵany anyqtaldy.
Túrkistan oblysy boıynsha «Qazsýshar» fılıaly bıyl sharýalarmen sý berý qyzmeti boıynsha 6160 kelisimshart jasady. Onyń ishinde, Maqtaaral jáne Jetisaı aýdandary boıynsha 111,1 myń gektar sýarmaly alqapqa sý berý týraly 2825 kelisimshart, Shardara aýdany boıynsha 41,3 myń gektar egis alqabyn tirshilik nárimen qamtamasyz etý jóninde 1280 kelisimshartqa otyrdy.
«Bıyldan bastap elimizdiń ońtústigindegi birqatar sharýalar úshin sýarmaly sý berý qyzmetiniń quny arzandady. Sebebi, 2024 jylǵy vegetasııalyq kezeńge daıyndyq aıasynda «Qazsýshar» mekemesi tutynýshylarmen tikeleı kelisimshartqa otyryp jatyr. Bul ortadaǵy deldaldardy alyp tastaýǵa múmkindik beredi. Tıisinshe birqatar tutynýshy úshin qyzmetterdiń qunyn arzandatady. «Qazsýshar» mekemesi 2024 jyldyń vegetasııa maýsymyna 19 myńnan astam tutynýshymen kelisimshartqa otyrýdy josparlap otyr», dedi sý resýrstary jáne ırrıgasııa mınıstri Nurjan Nurjigitov.