Túrkistan oblysynyń Sozaq aýdanyna Shý ózeni arqyly 1 mlrd tekshe metr sý jiberildi. Bul týraly Sý resýrstary jáne ırrıgasııa mınıstrligi habarlady, dep jazady Egemen.kz.
Sý resýrstary jáne ırrıgasııa mınıstrligi sýarý maýsymyna daıyndyqty qamtamasyz etý jumysyn jalǵastyryp jatyr. Máselen, Shardara sý qoımasyna 4,8 mlrd tekshe metr sý jınaldy. Osyǵan deıin О́zbekstanmen «Dostyq» kanaly arqyly 922 mln tekshe metr sý alý týraly ýaǵdalastyqqa qol jetkizilgen edi.
«Túrkistan oblysy boıynsha «Qazsýshar» fılıaly jóndeý jáne qurylys jumystaryn belsendi júrgizip jatyr. Mysaly, Shardara aýdanynda 302 tik drenajdy uńǵyma jóndelip jatyr. Sondaı-aq kásiporynnyń qaramaǵyndaǵy 600 shaqyrymnan astam kanal tazartyldy», dedi Sý resýrstary jáne ırrıgasııa mınıstrliginiń resmı ókili Móldir Ábdýalıeva.