QR Premer-mınıstriniń orynbasary Tamara Dúısenovanyń tóraǵalyǵymen ótken keńeste bilim berý nysandarynyń qaýipsizdigi máseleleri talqylandy. Jıynǵa ortalyq memlekettik organdardyń ókilderi men oblys ákimderiniń orynbasarlary qatysty, dep jazady Egemen.kz Úkimettiń baspasóz qyzmetine silteme jasap.
Búginde bilim berý nysandary mańyndaǵy jol qaýipsizdigi ınfraqurylymyn jaqsartýǵa baılanysty óńirlerde tıisti Jol kartalary bekitilgen. Onyń aıasynda mektepter, balabaqshalar, qosymsha bilim berý uıymdary mańynda baǵdarshamdar, jol belgilerin ornatý, jaıaý júrginshiler trotýarlaryn jasaý sekildi birqatar sharalar qamtylǵan.
Ishki ister mınıstriniń orynbasary Igor Lepehanyń keltirgen málimetinshe, 13 myńnan asa jalpy bilim berý mekemeleriniń (65%) mańynda barlyq tıisti talaptar saqtalǵan. Kórsetkishti jaqsartý úshin bıyl jáne kelesi jyly 28 myńnan astam sharalardy qolǵa alý josparlanyp otyr. Bıyl ázirge 570 nysannyń aınalasynda tıisti jumystar aıaqtaldy.
«Batys Qazaqstan, Qostanaı, Shyǵys Qazaqstan jáne Abaı oblystarynda jol qaýipsizdigi ınfraqurylymyn jaqsartýǵa baǵyttalǵan sharalarmen qamtylǵan nysandar sany 10-ǵa da jetpeıdi», dedi Igor Lepeha.
Qabyldanyp jatqan sharalar týraly oblys ákimderiniń orynbasarlary da baıandady.
«Bekitilgen jol kartasynda kórsetilgen merzimderdiń saqtalýyna basa mán bergen jón. Jaz mezgili tez óte shyǵady. Sondyqtan tıisti jumystardy atqarýǵa jaıly merzimdi barynsha tıimdi qoldaný kerek», dedi Tamara Dúısenova.
Keńeste sondaı-aq bilim berý nysandarynyń qaýipsizdik talaptaryna sáıkestigine qatysty da sóz qozǵaldy. Oqý-aǵartý mınıstrligi bıyl tıisti erejege ózgerister engizgen bolatyn. Oǵan sáıkes, kontıngenti 100 adamnan asatyn barlyq bilim berý mekemelerinde beınebaqylaý kameralary jedel basqarý ortalyqtary nemese aýdandyq polısııa bólimderine qosylyp, dabyl batyrmalary ornatylýy kerek. Buǵan deıin talap tek qalalar men aýdan ortalyqtaryna tıesili edi.
Al 700-den asa adam qabyldaıtyn mekemelerde týrnıketter ornatylyp, kúzet qyzmetterimen kelisimi bolýy shart.
Osyǵan sáıkes, ár óńir qaýipsizdik júıelerimen qamtý týraly jumys jospary bekitýde. Jospar ázirge Aqmola, Qaraǵandy, Qyzylorda, Abaı, Mańǵystaý, Jambyl, Pavlodar, Shyǵys Qazaqstan jáne Soltústik Qazaqstan oblystarynda ǵana qabyldanǵan.
Jıyn barysynda jaqynda Pavlodar oblysyndaǵy mektepte bolǵan jaǵdaı da sóz boldy. Oqý-aǵartý mınıstrliginiń ınfraqurylymdy damytý jónindegi departamenti dırektorynyń mindetin atqarýshy Marlen Qasenovtyń sózinshe, zań júzinde bilim berý mekemelerine kirgizýge tyıym salynǵan zattardyń tizimi bekitilgen, óńirler atalǵan tizimge sáıkes talaptardyń saqtalýyn qamtamasyz etýi tıis.
«Oqý-aǵartý, ishki ister mınıstrlikteri ákimdiktermen birge beınebaqylaý kameralaryn, dabyl batyrmalaryn, týrnıketterdi qamtamasyz etý boıynsha jumystardy kúsheıtýi qajet. Balalarǵa qaýipsiz orta qalyptastyrýda barlyq múmkindikti paıdalaný kerekpiz», dep tolyqtyrdy Tamara Dúısenova.
Vıse-premer múddeli memlekettik organdarǵa bilim berý mekemelerindegi qaýipsizdikti qamtamasyz etý úshin qosymsha sharalar qabyldaý jaǵyn qarastyrýdy tapsyrdy.