Búgin Bas prokýratýra men Interpol qyzmetkerleri Qazaqstan Respýblıkasynyń Syrtqy ister mınıstrliginiń kómegimen Ýkraınadan asa iri kólemde alaıaqtyq jasaǵan kúdiktini qylmystyq jaýapkershilikke tartý maqsatynda ekstradısııalady, dep habarlaıdy Egemen.kz.
Bas prokýratýranyń baspasóz qyzmeti habarlaǵandaı, ol 2017-2019 jyldar aralyǵynda Almatyda salynyp jatqan úıden páter beremin degen syltaýmen azamattardyń jalpy somasy 140 mln teńgeden astam múlkin ıemdenip alǵan.
Qylmys jasaǵannan keıin kúdiktige halyqaralyq izdeý jarııalandy.
О́tken jyldyń qarasha aıynda kúdikti Ýkraına aýmaǵynda ustalǵan.
«Qazaqstan Bas prokýratýrasynyń ótinishi boıynsha ýkraındyq tarap kúdiktini elimizge ekstradısııalaý týraly sheshim qabyldady. Aıta keteri, byltyr Ýkraınanyń qylmyskerlerdi ekstradısııalaý máseleleri boıynsha Qazaqstan-Ýkraına ózara is-qımylyn rettegen Mınsk konvensııasynan shyqqanyna qaramastan, atalǵan adamdy ustap berý Qazaqstan Respýblıkasy men Ýkraına arasyndaǵy 2018 jyly Qazaqstan Bas prokýratýrasy jasaǵan ekstradısııalaý týraly sharttyń arqasynda múmkin boldy», dep habarlady vedomstvo.
Sonymen qatar Astana men Kıev arasynda tikeleı áýe qatynasy bolmaǵandyqtan, izdeýde júrgen adamdy Ýkraınadan Moldova men Túrkııa arqyly ótkizýge týra keldi, ol úshin Bas prokýratýraǵa osy elderden adamdardy óz aýmaqtary boıynsha tranzıttik tasymaldaýǵa kelisimin alý qajet boldy.
Kúdikti Astana qalasyndaǵy tergeý ızolıatoryna qamaldy.
Aıyp taǵylyp otyrǵan qylmys jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý túrindegi jaza qarastyrylǵan.