Keńestik salt-sananyń seńi siresken sekseninshi jyldar. Stýdent kezimiz. Birde bizdiń ýnıversıtette ataqty Asanáli Áshimovpen kezdesý ótti. Kesh qonaǵyna qoıylǵan kóp suraqtyń keıbiri «Qyz Jibek» fılminde ol oınaǵan Bekejan róline baılanysty bolǵan edi. Sonda ártis aǵamyzdyń ázil-shynyn aralastyryp aıtqan myna bir áńgimesi áli kúnge esimnen ketpeıdi.
– Jalpy, Bekejan jaman jigit emes, – dep jınalǵan jurtty eriksiz eleń etkizgen Asekeń oqshaý oıyn ármen qaraı jalǵady. – Eliniń eńiregen eri. Syrttan jaý shapsa, aldymen atqa qonatyn sol. Onda da sulýdy súıetin júrek bar. Jany qalaǵan Jibegin jar etkisi kelse, qymyz iship, qyz izdegen kóldeneń kók attylar jolyn kes-kesteıdi. Keýdesin kernegen erkektik namys óne boıyn órtep bara jatsa, qaırat qylmaı qaıtpek endi? Onyń ornyna ózderińdi qoıyp kórińdershi. Dıskotekaǵa ertip aparǵan bıkeshterińdi jelikken bireýler jetektep áketse, ne ister edińder? Odan zorǵysyn aıtaıyn, teginde Tólegen, Qozylardan urpaq qalmaǵan. Osy otyrǵan bárimiz Bekejan men Qodardyń úrim-butaǵymyz...
Al kerek bolsa!
Sosıalıstik realızmniń qasań qaǵıdasy boıynsha jaǵymsyz keıipker jaıyndaǵy bul «jaǵymdy» pikir tyńdarmandy siltideı tyndyrǵan-tuǵyn.
Keıde aınalamyzdaǵy adamdardyń astam qylyqtaryn kórgende kóńilimiz qulazyp, budan qyryq jyl buryn estigen Asaǵań sóziniń jany bar ma dep qalam. Máselen, ózi basqaratyn memlekettik mekemeni jekemenshik qojalyǵyndaı bılep-tóstep, qaramaǵyndaǵy qyzmetkerlerdi qan qaqsatyp, bolmashy sebepterge bola jer jebiri, jeken sýyna jetip jekiretin ashý shaqyryp aıqaılaǵanda aýzynan aq ıt kirip, kók ıt shyǵatyn ákireńbaı ákim-qaralardyń jaǵa ustatar jaman ádetteri árkimniń-aq jıirkenishin týdyrary talassyz. Bilim-biligi tómen, biraq ózderin bıik tulǵa sanaıtyn mundaı urdajyq bastyqsymaqtardy amalsyz «Alpamys batyr» jyryndaǵy Ultan qulǵa uqsatasyń. Esterińizge sala ketsek, Alpamys batyr baı ákesi Baıbóriniń bar malyn barymtalaǵan qalmaqtyń Taıshyq hanymen atysyp-shabysýǵa attanyp, jeti jyl joryqta júrgende jýyndyǵa sekirgen ıtteı álgi Ultan ábden esirip, artynda ańyrap qalǵan el-jurttyń eńsesin ezip, azyp-tozǵan aǵaıyndarynyń basyna áńgirtaıaq oınatpaýshy ma edi?
Qojyraǵan qoǵamnyń álsiz tustaryn paıdalanyp áldekimderdiń áleýetti qoldaýymen qoqańdap, bıliktiń bıshigin ustaǵan bázbireýler tapqan-taıanǵandary tamaǵynan aspaıtyn baǵynyshtylaryn basynyp bitedi.
Áperbaqandyqtan ábden tıtyqtaǵan kónterili áleýmet osynyń bárine kónetinin qaıtersiń. Kónbegenderi aýyldaǵy atqaminerlerdiń ústinen aýdan, oblys, Astanaǵa aryzdanady. «Turymtaıdan qorlyq kórgen boztorǵaılar» borbaı eti borsha bolyp izdegen áleýmettik ádiletin tapsa jaqsy. Tappasa she?
Qazir bizge «qolynan kelse, qonyshynan basatyn» tasyr minezdi taltańbaılardy tártipke salatyn Alpamys tárizdi asyl tekti azamattar qajet!