Ulttyq qurama sapynan Parıj Olımpıadasyna lısenzııa jeńip alǵan sportshynyń biri – boksshy Aıbek Oralbaı (92 kg). Joldamany ol bıyl Italııanyń Býsto-Arsısıo qalasynda ótken álemdik irikteý kezeńinde jeńip alǵany málim, dep habarlaıdy Egemen.kz Týrızm jáne sport mınıstrligine silteme jasap.
Ol 2018 jyly bokstan Argentınanyń Býenos-Aıres qalasynda ótken jasóspirimder arasyndaǵy jazǵy Olımpıada chempıony.
«Aıbek Oralbaı jastar arasyndaǵy básekede de, eresekter dodasynda da talaı jetistikke jetken. Al onyń endigi basty maqsaty – Olımpıadanyń altynyn alý. Sol maqsatyna jetý úshin erinbeı eńbek etip jatyr», dep pikir bildirdi ulttyq quramanyń bas bapkeri Myrzaǵalı Aıtjanov.
Qazirgi ýaqytta Aıbek Oralbaı ulttyq qurama boksshylarymen birge Parıj Olımpıadasyna daıyndalyp jatyr. Olımpıadada kimniń baǵy janady, sol boksshy chempıon atanady dep esepteıdi.
«Olımpıadadaǵy qarsylastaryma daıyndyqty qazirden bastap kettik. Biraq tehnıkalyq, taktıkalyq daıyndyqqa jekpe-jekke bir kún qalǵanda kirisemiz. Aýyr salmaq bolǵan soń, bizdiń salmaqta kil myqty boksshylar jınalǵan. Halyqaralyq týrnırdiń chempıondarynan bastap, álem, Azııa chempıonatynyń jeńimpazy men júldegerlerine deıin bar. Olardyń bárimen sharshy alańda kezdeskenmin, kóbimen sparrıng jasaǵanbyz. Atap aıtqanda, eki dúrkin Olımpıada chempıony, bes dúrkin álem birinshiliginiń jeńimpazy kýbalyq Hýlıo Sesar la Krýspen, ózbekstandyq, ıtalııalyq, ıspanııalyq boksshylarmen rıng ishinde de, syrtynda da kezdeskenbiz. Bylaısha aıtqanda, qarym-qabiletimen, áleýetimen tanyspyn. Olardyń bizden asyp bara jatqan eshteńesi joq. Bárimiz bir deńgeıdegi boksshylarmyz dep aıta alamyn. Qudaı buıyrtsa, Parıjde barymdy salamyn. Bul jerde kóp nárse babyńmen qatar, baǵyńa da baılanysty ekenin umytpaǵan abzal. Kimniń baǵy janady, sol Olımpıada chempıony bolady dep oılaımyn», deıdi Aıbek Oralbaı.