Senattyń Ekonomıkalyq saıasat, ınnovasııalyq damý jáne kásipkerlik komıtetiniń depýtattary Jambyl oblysynda bolyp, bıznes ókilderimen kezdesti. Júzdesýge qatysýshylar óńdeý ónerkásibin damytý máseleleri jáne ony sheshý joldaryn talqylady, dep habarlaıdy Egemen.kz Parlament Senatynyń baspasóz qyzmetine silteme jasap.
Depýtattar oblys kásipkerlerin tolǵandyrǵan taqyryp Parlament Senatynda ótken óńdeý ónerkásibi týraly parlamenttik tyńdaýda qaralǵan máselelermen sabaqtas ekenin atap ótti. Onda otandyq shıkizattyń óndiristegi tapshylyǵy, gaz ben elektr energııasynyń jetispeýshiligi, jabdyqtardyń tozýy, qarjy resýrstaryna qol jetkizýdegi qıyndyqtar jáne memlekettik qoldaý sharalarynyń jetkiliksizdigi týraly aıtyldy.
Parlamentshiler kezdesý barysynda kóterilgen máseleler nazarda bolatynyn jáne depýtattardyń budan bylaıǵy zań shyǵarý qyzmetinde eskeriletinin atap ótti.
Depýtattar sondaı-aq «Evrohım» mıneraldy-hımııa kesheninde, «Qazfosfat» mıneraldy tyńaıtqysh shyǵaratyn, «Talasinvestment company» natrıı sıanıdin óndiretin, Jambyl «Imstalkon» metall konstrýksııasy» zaýyttarynda jáne «Taraz bylǵary aıaq kıim» kásipornynda boldy.