Zamanaýı tehnologııa ómirimizge dendep enip jatqan ýaqytta jas býynnyń boıyna ulttyq qundylyqtardy sińirip ósirýdiń mańyzy zor. Ulttyq rýhtan qaınap shyqqan taza bulaqtyń qashanda bereri mol, bedeli bıik bolady. Osy maqsatta Astana qalasy Smaǵul Sádýaqasuly atyndaǵy №78 mektep-gımnazııada EtnoART «Mıras» lageri ashyldy. Bul demalys ornynyń ereksheligi – munda oqýshylar ádet-ǵurypty, salt-dástúrdi tereńirek meńgerip, umytylyp bara jatqan qolóner buıymdaryn óz qoldarymen jasap úırenedi.
EtnoART «Mıras» lagerine 5–10 synyp oqýshylary qatysa alady. Munda 25 oqýshydan úsh top qurylǵan. Aıta keterligi, jazǵy lagerde «Ájeler» mektebi de jumys isteıdi. Olar balalarǵa keste toqyp, urshyqpen jip ıirýdiń ádisterin, sondaı-aq ulttyq taǵam túrlerin qalaı ázirlenetinin búge-shigesine deıin kórsetedi.
«Biz ata-babamyzdan mıras bolyp kele jatqan qolónerdi jetkinshekterge kórsetip qana qoımaı, qalaı jasalatynyn tolyq úıretemiz. Sondaı-aq ár buıymnyń tarıhyn, qalaı atalýyn, jasalý joldaryn túsindiremiz. Lager ataýynyń «Mıras» dep atalýy da sol sebepti. «Jastaıynan úıretseń, tasqa oıǵan tańbadaı, qartaıǵanda úıretseń, sýǵa jazǵan jazýdaı» degen sózdi únemi aıtyp júremin. Búginde qala oqýshylary ulttyq qolóner buıymdaryn kóp bile bermeıdi. Sondyqtan bul jobanyń ózektiligi joǵary. Buǵan dálel – qazirdiń ózinde lagerge basqa aımaqtardan qatysýǵa nıet bildirip jatqan oqýshylardyń qarasy óte kóp», deıdi №78 mektep-gımnazııa kórkem eńbek pániniń muǵalimi, ıdeıa avtory Lázzat Atybaı.
Maýsymnan jumysyn bastaǵan etnolager shildeniń sońyna deıin tórt aýysym boıy jumys isteıdi. Al árbir aýysym eki aptadan bolady. Aıta keteıik, atalǵan etnolagerge batys aımaqtyń oqýshylary da onlaın rejiminde qatysa alady.