Astana qalasynyń mýzykalyq jas kórermen teatry «Astanadan Semeıge sálem» atty óner saparymen 31 mamyr jáne 3 maýsym aralyǵynda Abaı men Muhtar eline aıaq basty. Tórt jyldan beri elorda mádenıetine erekshe serpin ákelgen teatr gastroldik sapary aıasynda oblys jurtshylyǵyna M.Áýezovtiń shyǵarmasy negizindegi «Abaı-Toǵjan», D.Isabekovtiń «Gaýhartas» jáne A.Volodınniń «Qoshtasqym kelmeıdi...» mýzykalyq dramalaryn usyndy.
Jas urpaqtyń dúnıe tanymyna, jan dúnıesine, rýhanı bolmysynyń qalyptasýyna áser etetin «Abaı-Toǵjan» mýzykalyq dramasyna uly oıshyl ǵumyrynyń bozbala shaǵy arqaý boldy. Jas Abaıdyń júreginde oıanǵan alǵashqy mahabbaty, kókireginde týǵan tuńǵysh jyry áýezdi ánge aınalyp, ishki sezim tebirenisterin alasapyran kúıge salatyn sátter kórermen talqysyna tústi.
Kórnekti jazýshy-dramatýrg Dýlat Isabekovtiń tyrnaqaldy týyndylarynyń birine balanǵan «Gaýhartas» povesiniń sahnalyq nusqasy – mýzykalyq drama janryndaǵy qoıylym kópshilikke erekshe áser etkendeı kórindi. Jetpisinshi jyldardaǵy ata kásip – shopandyqpen aınalysyp, qarapaıym ǵana tirshilik keshken shaǵyn otbasynyń shynaıy ómiri men kisilik kelbetteri kestelengen shyǵarma. Mýzykalyq jas kórermen teatrynyń qoǵammen baılanys jáne aqparat bólimniń basshysy Ádilǵazy Baqytulynyń aıtýynsha ádebı týyndy da, osyǵan deıin áni men tereń mánimen talaı júrekti terbegen «Gaýhartas» povesi de, kınofılm de bar. Alaıda jan saraıyna móldirlik pen ińkárlikke tunǵan Saltanat, qatýly Tastan, názik bolmysty Qaıyrken sııaqty dramalyq obrazdar arqyly jastar únin, búginginiń sózin jetkizýge tyrysqan.
Semeı kórermeni tamashalaǵan atalǵan teatrdyń taǵy bir qoıylymy «Qoshtasqym kelmeıdi..» mýzykalyq dramasy. Bul kórnekti orys dramatýrgi A.Volodınniń tereń psıhologızmmen erekshelenetin pesasy ajyrasýǵa bel býǵan segiz otbasynyń taǵdyryna qurylǵan. Teatrdyń jas býyn akterleri spektakldi oınap-shyǵýmen birge ómirdiń qarapaıym da kúrdeli jaqtary haqyndaǵy oılardy ortaǵa saldy.
Qorjyndaryn «Synshylar júldesi-2023» «Jyl aktrısasy – 2023», «Umai» ulttyq syılyqtarymen maılaǵan Astana qalasynyń mýzykalyq jas kórermen teatry osylaı Abaı týǵan mekennen shabyttanyp attandy. Osyǵan deıin Batys Qazaqstan oblysy men Aqtóbe qalasynda óner saparymen bolǵan jas akterlerdiń aldynda О́skemen men Shymkenttegi oıly kórermenniń kóńilinen shyǵý maqsaty tur.
Abaı oblysy