Bank sektoryna jańa qarjy ınstıtýty qosylady degen habardyń taraǵanyna biraz bolǵan. Prezıdent buǵan deıin úsh bank kelýi múmkin degendi aıtty. Biraq sarapshylardyń eshbiri naqty qandaı uıymnyń qosylýy múmkin ekenin tap basyp aıta almady. Odan keıin mıkroqarjy uıymdary bankke aınalýy múmkin degen áńgime aragidik sóz bolyp júrdi. Mundaıda «KMF» pen «Solva» aýyzǵa iligetin. Biraq bul boljamnyń biri de oryndalmady. Birer kún buryn bilgenimizdeı, koreıalyq mıkroqarjy uıymy endi otandyq naryqtaǵy jumysyn bank retinde jalǵastyratyn boldy.
«BNK Financial Group Inc.» kompanııasynyń qurylymyna kiretin «BNK Finance Kazakhstan» mıkroqarjy uıymy ekinshi deńgeıli bankke aınalýǵa ruqsat aldy dep habarlady Qarjy naryǵyn retteý jáne damytý agenttigi (QNRDA). Bul týraly Koreıa Respýblıkasynyń prezıdenti Iýn Sok Ioldiń elimizge memlekettik sapary aıasynda uıymdastyrylǵan Qazaqstan – Koreıa bıznes-forýmynda málim boldy. QNRDA, Qarjy qyzmetteri jónindegi komıssııa (FSC) jáne Koreıa Respýblıkasynyń Qarjylyq qadaǵalaý qyzmeti (FSS) arasynda «Banktik qadaǵalaý salasyndaǵy ózara túsinistik» týraly memorandýmǵa qol qoıyldy.
«Qujat (memorandým) ınvestısııalardyń qaýipsizdigin qamtamasyz etedi. Bizdiń elde jumys isteıtin Koreıanyń «BNK Finance Kazakhstan» mıkroqarjy uıymyn ekinshi deńgeıli bankke aınaldyrý týraly sheshimdi qoldaımyn», dedi Qasym-Jomart Toqaev.
«BNK Financial Group Inc.» – Ońtústik Koreıanyń 129 mlrd dollarlyq aktıvteri men ulttyq «AAA» reıtıngi bar eń iri qarjy toby. Top qurylymyna «A2» halyqaralyq reıtıngine saı 300-den astam fılıaly bar 2 bank kiredi. «BNK Finance Kazakhstan» 2021 jylǵy sáýirden bastap QNRDA lısenzııasyna ıe. MQU-nyń tikeleı aksıoneri – 6,7 mlrd dollar mólsherinde aktıvi bar «BNK Capital» bolyp sanalady. Úsh jyl ishinde MQU aktıvi 5 ese ulǵaıyp, 20,3 mlrd teńgeni quraǵan. Nesıe portfeli 6 ese artyp, 18,8 mlrd teńgege jetken.
«Mıkroqarjy uıymynyń ekinshi deńgeıli bankke aınalýy Qazaqstanda alǵash ret bolyp otyr. Mundaı aýysýdy júzege asyrýǵa múmkindik beretin tıisti zańnamalyq bazany biz ótken jyly qabyldadyq. Qarjy retteýshisi retinde osyndaı birinshi ruqsatty berdik jáne bul halyqaralyq qarjy konglomeratyn bildiretin sheteldik bank ekendigi qýantady. Bul – búkil naryq úshin mańyzdy oqıǵa. Úderistiń basty ereksheligi – mıkroqarjy uıymy óz qyzmetin toqtatpaıdy. Banktik lısenzııa alǵanǵa deıingi kezeńde de mıkroqarjy uıymy operasııalaryn standartty rejimde jalǵastyrady», deıdi agenttik tóraǵasy Mádına Ábilqasymova.
Aıtýynsha, «BNK Finance Kazakhstan»-nyń jańa róli men mártebesi bank sektoryndaǵy básekelestikti kúsheıtedi.
«Jańa banktiń paıda bolýynan birinshi kezekte klıentter, qarjylyq qyzmetterdi tutynýshylar utady. Sheteldik bank halyqaralyq toptyń úzdik korporatıvtik standarttaryna sáıkes qarjylyq qyzmet kórsetedi. Jańa oıynshynyń jospary orasan. Sheteldik bank shaǵyn jáne orta bızneske nesıe berýdi, korporatıvtik kredıtteýdi, saýda-sattyqty qarjylandyrýdy, qarjy lızıngin, jobalyq qarjylandyrýdy jáne bólshek bıznesti qarjylandyrýdy josparlap otyr», dedi Mádına Ábilqasymova.
«Tengenomika» telegram arnasynyń habarlaýynsha, bıyldyń ózinde ekinshi deńgeıli bankter klýbyna tórt jańa qarjy uıymy qosylýy múmkin.
«Aktıvter men nesıe portfeliniń eleýli úlesin birneshe iri bank alyp jatqan elimizdiń bank sektory joǵary shoǵyrlanǵan dep beker aıtylmaıdy. Sol sebepti, Prezıdenttiń básekeni arttyrý úshin sheteldik bankterdi shaqyrýy óte qısyndy boldy. «Sberdiń» burynǵy enshiles banki, qazirgi «Bereke Bank» qatarlyq «Lesha Bank»-ke satylyp, sheteldik aksıonerge ıe boldy. «KMF» pen «Solva» da bıyl bankke aınalýdy kózdep otyr. Osylaısha, jyl sońyna deıin sektor jańa qatysýshylarmen tolyǵýy múmkin. Bul qarjy qyzmetin tutynýshylar úshin pozıtıvti jańalyq», dep jazady kanal avtorlary.
Ásem Janatova,
L.N.Gýmılev atyndaǵy EUÝ-dyń 2-kýrs stýdenti