Premer-mınıstrdiń orynbasary Tamara Dúısenovanyń tóraǵalyǵymen joǵary oqý ornynyń basqarma tóraǵasy-rektory laýazymyna úmitkerlerdi aıqyndaý jónindegi respýblıkalyq komıssııanyń kezekti otyrysy ótti.
Komıssııanyń quramynda Parlament Májilisiniń depýtattary, Ǵylym jáne joǵary bilim mınıstrliginiń, JOO qaýymdastyǵynyń, «Atameken» ulttyq kásipkerler palatasynyń ókilderi jáne qoǵam qaıratkerleri bar.
Eń aldymen, Ǵylym jáne joǵary bilim mınıstri Saıasat Nurbek komıssııa múshelerin rektorlardy aıqyndaý jónindegi tártiptiń jańa erejesimen tanystyrdy. Erejege sáıkes, úmitkerlerge qoıylatyn talaptar kúsheıtildi. Eń basty mindet – tıimdi menedjment arqyly joǵary bilim sapasyn kóterýge yqpal etý.
Rektorlyqqa úmitkerdiń ǵylymı dárejesi, bilim jáne ǵylym salasynda kem degende 5 jyl basqarý tájirıbesi bolýy kerek. Kandıdattyń ǵylymı ataǵy (professor, dosent) da eskeriledi. Bul – rektorǵa qoıylatyn talaptardyń bir bóligi ǵana.
Kezekti otyrys barysynda eldegi 3 joǵary oqý ornynyń basshylyǵyna úmitkerler tyńdaldy.
Rýdnyı ındýstrıaldy ýnıversıteti negizinen tehnıkalyq ǵylymdar men tehnologııalar boıynsha mamandar daıyndaıdy. Oǵan rektor bolýdan úmitti 4 azamat baǵdarlamasyn qorǵady. Nátıjesinde, Nurbek Saparqojaevtyń kandıdatýrasy kópshilik daýyspen qoldaý tapty.
Qaraǵandy ındýstrıaldy ýnıversıteti – kóbine tehnıkalyq mamandar daıarlaýǵa mamandanǵan joǵary oqý orny. Onyń rektory qyzmetine 2 úmitker usynylǵan bolatyn. Olar ýnıversıtettiń aldaǵy 5 jylǵa arnalǵan damý josparyn usyndy. Nátıjesinde, kópshilik daýyspen Baqyt Jáýtikovtiń jobasy úzdik dep tanyldy.
Teriskeıdegi kóne oqý oryndarynyń biri – Manash Qozybaev atyndaǵy Soltústik Qazaqstan ýnıversıteti birqatar baǵytta mamandar daıyndaıdy. Munda gýmanıtarlyq, tehnıkalyq, ınjenerlik, aýyl sharýashylyǵy sekildi salalar boıynsha shákirtter oqytylýda. Irgeli oqý ornynyń rektory bolýǵa úmitker 2 azamat óz baǵdarlamalaryn usyndy. Komıssııa músheleri Erbol Isaqaevtyń kandıdatýrasyn kópshilik daýyspen qoldady.
«Elimizdiń eńbek naryǵyna qajetti mamandar daıarlaý – asa joǵary jaýapty mindet. Búgin komıssııa músheleri maquldap, taǵaıyndaýǵa usynylǵan azamattar artylǵan senimdi aqtaıdy dep oılaımyn», dep atap ótti Tamara Dúısenova.