Shymkentte sıfrlandyrý salasynda jumys isteıtin eki sheneýnik pen bir kásipkerge qatysty úkim shyqty, dep habarlaıdy Egemen.kz.
«Shymkent qalasynyń qylmystyq ister jónindegi aýdanaralyq soty Túrkistan oblysynyń Sıfrlandyrý, memlekettik qyzmet kórsetý jáne muraǵattar basqarmasy bastyǵynyń orynbasary M.Myrzaseıitovke, osy basqarmanyń bólim basshysy A.Jolseıitovke jáne kásipker E.Isakovke qatysty úkim shyǵardy», dep habarlady Sybaılas jemqorlyqqa qarsy qyzmet.
2022 jyldyń tamyzynan 2023 jyldyń shildesine deıingi kezeńde memlekettik organdardy aqparattandyrý jáne sıfrlandyrý jónindegi qyzmetterdi memlekettik satyp alý kelisimsharttaryn jasasqany, olar boıynsha atqarylǵan jumystardyń aktisine qol qoıý úshin jalpy somasy 14,6 mln teńgeni quraıtyn birneshe ret para alǵany jáne bergeni úshin, sonymen qatar Jolseıitov budan basqa - para berýge jáne alaıaqtyq jasaýǵa ıtermelegeni úshin kináli dep tanyldy.
Jolseıitov Tólebı aýdanynyń Sıfrlandyrý bóliminiń basshysy laýazymyna aýysqannan keıin osyndaı áreketterdi oryndaǵany úshin joǵary turǵan laýazymdy tulǵalarǵa berý syltaýymen Isakovtyń 903 myń teńge somasyndaǵy aqshalaı qarajatyn alaıaqtyq jolmen ıemdengeni anyqtaldy.
Dál osyndaı úkimmen Otyrar aýdany ákimi apparatynyń basshysy A. Máýlen konkýrstyń jeńimpazyn anyqtaǵany jáne aýdannyń aýyldyq okrýgterine IT-qyzmetterdi memlekettik satyp alý kelisimshartyn jasaǵany úshin Isakovtan 5 mln teńge somasynda para alǵany úshin kináli dep tanyldy.
«Sot Myrzaseıitovti 8 jylǵa, Ysqaqovty 7 jylǵa, Jolseıitovti 4 jylǵa bas bostandyǵynan aıyrý týraly úkim shyǵardy. Sonymen birge atalǵan adamdar memlekettik qyzmette laýazymdardy atqarý quqyǵynan ómir boıy aıyryldy», delingen habarlamada.
Sot Máýlenniń ólimine baılanysty oǵan qatysty qylmystyq qýdalaýdy toqtatty. Úkimdi jarııalaý oblystyq Sıfrlandyrý basqarmasy ujymynyń qatysýymen ótti. Úkim zańdy kúshine engen joq.