Naǵashymnyń kenje balasy áskerı mindetin abyroımen atqaryp, elge oralǵan. Burynǵy dástúrdi qatty saqtaıtyn naǵashym ózimizge qaraǵan tilektes, nıettes et jaqyn aǵaıyn-týysty shaqyryp, qurmaldyq berdi. Alpys úıli aýyldy tegis qamtyǵanǵa uqsaıdy. Mundaıda qońsylas otyrǵan aǵaıyndy qalaı tastap ketersiń? Dastarqan basynda bıylǵy jaýynnyń jıiligi, shóptiń shyǵymy týraly kúndelikti tirshiliktiń jaı-japsary áńgime boldy. Dám qaıyryp shyqqan soń anyq kórdik, keıbir ıeleri kóship ketken soń, bosap qalǵan úılerdiń arasyn qalyń shóp basyp ketipti. Buryn shilde týmaı aıtaqyr bolyp jatýshy edi. Rabaısyz ósken shóp birtúrli kórinedi eken.
Qonaqtar razy bolyp attandy. Olaı bolmaǵanda she? Naǵashymnyń qyzdary men kelin-kepshikteri kisi kútip ábden úırenip qalǵan eken. Biz de úzeńgige aıaǵymyzdy salmaqshy bolyp umtylǵanda naǵashym «Toıtarqardyń ishinde bolyńdar», dedi. Bizdiń jaqta qonaq shaqyrǵannan keıin elge qyzmet etken kelin-kepshiktiń ońasha otyryp shaı ishetin ádeti bolýshy edi. Bul joly naǵashym toıtarqarǵa alystan kelgen birer kisimen qosa balalaryn da ortaqtastyrdy.
– Sabyr, sen kisiniń qolyna sý quıǵanda eptiligiń kórinip turady eken. Sýdy shashyratpaı, súlginiń de tazasyn, qurǵaǵyn jańalap berip turdyń. Úlkenderden bata alǵan bala jaman bolmaıdy, – dep naǵashym jeti-segiz jasar nemeresiniń mańdaıynan bir sıpap qoıdy.
Sodan soń qyzmet qylǵan barsha aǵaıynnyń búgingi qonaq kútý barysynda atqarǵan qyzmetin taldap, jiktep, kem-ketigin qatty aıtpasa da, sóz astaryna salyp baıandap shyqty. Qutty bir óndiristik jınalys ótkizip, ujym músheleriniń isin taldap otyrǵan adam tárizdi.
Toıtarqardan keıin qas qaraımaı turǵanda barar jerimizge jetip qalaıyq dep ile attandyq. Jol ústindegi jolaýshyǵa oı serik. Kópti kórgen kósheli adamnyń tálim-tárbıesi eken ǵoı bul. Saıyp kelgende toıtarqar shaı ishý ǵana emes, kádimgi tárbıe mektebi bolyp shyqty. Qashannan dastarqany jıylmaıtyn darqan qazaqtyń kisi kútý mádenıeti, ádemi ádibi, meımanǵa kórseter ystyq yqylasy osyndaıdan týyndaıdy. San salaly sharýa bir arnada toǵysqan kezde jalpy jurttyń basyn qosatyn birliktiń qýatyn arttyra túsetindeı. Darqan dalanyń danalyǵyn boıyna jıǵan osy meniń naǵashymdaı qazynaly qarttar barda álmısaqtan jalǵasyp kele jatqan tálimdi tárbıeniń arqaý jibi úzilmeıtin shyǵar.
Toıtarqardyń túpki maqsaty osy eken ǵoı.
Kókshetaý