Batys Qazaqstan oblysynda mádenıet salasyna qarasty ǵımarattardy jańadan salý jáne kúrdeli jóndeý keıingi jyldary erekshe qarqyn aldy. Bul jaıynda oblys ákiminiń orynbasary Baqytjan Narymbetov habarlady.
Byltyr óńirde Bókeı ordasy aýdanynyń Bısen aýylynda jáne Tasqala aýdanynyń Mereı aýylynda sý jańa mádenıet úıi salynyp, halyqqa qyzmet ete bastaǵan bolatyn. Buǵan qosa óńirdiń maqtanyshy – Han ordasyndaǵy Jáńgir han stavkasynda vızıt ortalyq pen ákimshilik ǵımarat salyndy. Han ordasy aýylyndaǵy mádenıet úıi de kúrdeli jóndeýden ótip, jarqyrap tur. Bıyl tarıhı mekenge deıingi jol qurylysy aıaqtalyp, paıdalanýǵa berilse, týrıster tasqyny molaıady degen úmit bar.
«Sonymen qatar bıyl Han Ordasy mýzeı-qoryǵy quramyndaǵy Han saraıy men Qazynashylyq ǵımaratyna restavrasııa jasalady», deıdi Baqytjan Haberuly.
Byltyr kúrdeli jóndeýden ótip, jańaryp qalǵan mádenıet nysandarynyń qatarynda Syrym aýdanynyń Alǵabas aýyldyq mádenıet úıi jáne Aqjaıyq aýdanyna qarasty Mergen aýylynyń mádenıet úıi de bar.
Munyń bári ótken jyldyń jemisi bolsa, bıyl óńirdiń mádenıet salasyndaǵy oń ózgeris odan da kóbeıe túsken.
Qazirdiń ózinde aýyldarda sý jańa 4 mádenıet úıi boı kóterip jatyr. Olar – Jańaqalanyń Qyrqopa, Syrymnyń Toǵanas, Báıterektiń Shapov jáne Qaztalovtyń Qaıyńdy aýyldaryndaǵy mádenıet oshaqtary.
Keıingi jyldary kúrdeli jóndeýge jabylǵan Hadısha Bókeeva atyndaǵy qazaq drama teatrynyń ǵımaratynda qurylys jumysy toqyrap, teatr ujymy kóshpeli ǵumyr keship ketken bolatyn. 30 jyldyq mereıtoıyn óz dárejesinde atap óte almaǵan teatr qyzmetkerleriniń narazylyǵy oryndy da edi. Baqytjan Narymbetov teatrdyń jóndeý jobasyna ózgeris engizilgen soń jumys qaıta jalǵasatynyn aıtty. Sondaı-aq Ostrovskıı atyndaǵy drama teatr ǵımaratyn da kúrdeli jóndeý jobasy jasaqtalyp, qarajat bólinipti. Buǵan qosa bıyl 80 jyldyq mereıtoıyn atap ótkeli otyrǵan oblystyq halyq shyǵarmashylyq ortalyǵynyń ǵımaraty da jóndeledi.
Aýyldyq mádenıet úılerin jańǵyrtý boıynsha Bórli aýdanynda jaqsy jańalyq kóp. Mundaǵy Jarsýat, Keńtúbek jáne Býmakól aýyldarynda mádenıet úıleri bıyl kúrdeli jóndeýden ótedi eken.
Osyndaı eleýli oqıǵalar Syrym aýdanynda da bolyp jatyr. Aýdannyń tolaıym tarıhyn túgendegen Syrym Datov atyndaǵy tarıhı-ólketaný mýzeıine byltyr bólek ǵımarat berilip, kúrdeli jóndeýden ótti. Jańarǵan mýzeıde jańa ekspozısııa jasaqtalyp, jaqynda ǵana esigin aıqara ashqanynan bizdiń gazet oqyrmandary habardar. Baqytjan Haberulynyń aıtýynsha, Jympıty selosynda endi kitaphana ǵımaratynyń qurylysy bastalǵaly jatyr eken. Merdiger anyqtalǵan, joba bekitilgen.
«Qazirgi tańda «Qazaqstan halqyna» qorymen birlese elimizde alǵash ret «Aýyl kitaphanalaryn modernızasııalaý» jobasyn júzege asyrǵaly otyrmyz. Osy joba aıasynda 25 aýyldyq kitaphanany qaıta jańǵyrtý jumysyn júrgizemiz. Bıyl Aqjaıyq jáne Jańaqala aýdandyq kitaphanalary qaıta jańǵyryp, óz jumysyn jańasha bastaıdy», deıdi oblys ákiminiń orynbasary.
«Memleket basshysy jıi aıtyp júrgen «kásipkerliktiń áleýmettik jaýapkershiligi» Batys Qazaqstan oblysynda da júzege asyp jatyr. «Qarashyǵanaq Petroleým Opereıtıng» kompanııasynyń áleýmettik ınvestısııasy esebinen Oral qalasyndaǵy Jastar mádenıet saraıy men Derkól kentindegi mádenıet úıi kúrdeli jóndeýden ótpek. «Bul jumystar osy jaz aılarynda bastalyp, kúzde aıaqtalady», deıdi Baqytjan Haberuly. Onyń aıtýynsha, kreatıvti ındýstrııany damytý jóninde Memleket basshysynyń tapsyrmasyna oraı jańǵyrǵan Jastar mádenıet úıinde «Samuryq Qazyna Trast» qorymen birlesip kreatıv hab alańyn ashý josparlanyp otyr eken.
«25 aýyl kitaphanasynyń jańǵyrýy jáne Oral qalasynda ashylatyn kreatıv hab óńir jastarynyń ýaqytyn sapaly, tıimdi, zamanaýı formatta ótkizýge arnalǵan nátıjeli joba bolatynyna senemiz» deıdi oblys ákiminiń orynbasary.
Aıta keteıik, búginde Batys Qazaqstan oblysynda 681 mádenıet oshaǵy, 24 mýzeı jumys istep tur.
Batys Qazaqstan oblysy