«Taldau Talks «YouTube arnasynda podkastyń kezekti shyǵarylymy jarııalandy. Onda sarapshylar Qazaqstandaǵy bank sektorynyń qazirgi ahýaly, negizgi syn-qaterler jáne jańa sıfrlyq sheshimder jaǵdaıyndaǵy el ekonomıkasyn damytý perspektıvalary týraly máselelerdi talqylady.
Pikirtalastyń bastamashysy ári moderatory Parlament Senatynyń tóraǵasy Máýlen Áshimbaev boldy. Oǵan Qarjy naryǵyn retteý jáne damytý agenttiginiń tóraǵasy Mádına Ábilqasymova, Halyk Bank basqarma tóraǵasy Úmit Shaıahmetova jáne qarjy-ekonomıka salasyndaǵy táýelsiz sarapshy Ǵalym Husaıynov qatysty.
Senat tóraǵasy bank júıesiniń qazirgi turaqtylyǵy jaǵdaıynda salanyń negizgi mindetteri jańa beıindi zańdy tıimdi iske asyrý, básekelestikti yntalandyrý, nesıeleýdiń qoljetimdiligin arttyrý jáne bıznes pen azamattarǵa sapaly qyzmet kórsetý ekenin atap ótti.
«Prezıdent Qasym-Jomart Toqaev bızneske banktik kredıt berýdi jandandyrý qajet ekenin birneshe ret atap ótip, osy sektordaǵy ózge de ózekti máselelerge nazar aýdarǵan bolatyn. Salany retteýdiń zamanaýı quqyqtyq negizin qalyptastyrý maqsatymen jańa Bankter týraly zań qabyldanyp, kúshine endi. Sondyqtan búgin biz jańa erejelerdiń is júzinde qalaı jumys istep jatqanyn jáne olardyń básekelestikke, nesıeniń qoljetimdiligine ári jalpy ekonomıkanyń damýyna qalaı áser etetinin talqylap otyrmyz. Halyqaralyq reıtıngtik agenttikter rastaǵan jalpy kórsetkishter eldiń qarjy júıesine degen senimniń saqtalǵanyn kórsetedi. Aldaǵy jyldardaǵy bank júıesiniń mindeti – osy oń úrdisti saqtap, ilgeri damýdy qamtamasyz etý jáne halyq pen bızneske sapaly qyzmet usyný», dedi Máýlen Áshimbaev.
Sarapshylar joǵary bazalyq mólsherlemeniń bank sektoryna áserin de talqylady. Sonymen qatar Senat tóraǵasy borysh júktemesiniń tabysqa qatynasy koeffısıentin engizý bankterge qaryz alýshynyń tek aǵymdaǵy tólemderin ǵana emes, barlyq mindettemeler kólemin baǵalaýǵa múmkindik beretinin tilge tıek etti. Alaıda bul kórsetkishti shamadan tys qatań qoldaný, ásirese, bólip tóleý nemese mıkroqaryzdary bar adal azamattardyń nesıe alý múmkindigin shekteýi yqtımal. Sondyqtan bul máselede tepe-teńdikti saqtaý asa mańyzdy.
Budan bólek, qatysýshylar birqatar baǵyt boıynsha pikir almasyp, birlesken jumystyń negizgi mindetterin belgiledi. Atap aıtqanda, retteý saıasatyn jetildirý, aqsha-kredıt jáne fıskaldyq quraldardy úılestirý arqyly ınflıasııany tejeý men nesıeleýdi qoldaý arasyndaǵy teńgerimdi tabý, sondaı-aq, bank jáne fınteh sektorlaryn transformasııalaý máselelerine erekshe mán berildi.
«Taldau Talks» – el damýynyń ózekti máseleleri men Memleket basshysy qoıǵan mindetterdi iske asyrýdyń naqty qadamdary talqylanatyn ashyq dıalog alańy.