Tutynýshylar quqy qalaı qorǵalady?

О́tken jyly Tutynýshy­lar quqyǵyn qorǵaý komıteti men aýmaqtyq departamentter 50 myńnan astam ótinishti qaraǵan. Byltyr 23 myńǵa taıaý ótinishke baılanysty quqyqtyq kómek kórsetilgen. 19 myńynyń ­talaby qanaǵattandyrylyp, 9 myńǵa jýyǵy memlekettik organdarǵa joldanǵan. 600-i keri qaıtarylǵan. Shaǵymdardyń birazy bólshek saýdaǵa (36,5 pa­ıyz), elektrondy saýdaǵa (15,2 paıyz), turmystyq qyzmetterge (12,7 paıyz),turǵyn úı-kom­mýnaldyq sharýashylyǵyna (9,1­ paıyz) jáne baılanys qyzmetterine (4,1 paıyz) qa­tysty bolǵan. Qabyldanǵan sharalardyń arqasynda shaǵym túsirgen tutynýshylardyń quqyǵy qorǵalyp, jalpy somasy 1 mlrd teńgeden astam qarajat qaıtarylǵan.

Bıylǵy jumys topta­ry­nyń otyrystarynda tu­ty­ný­shylardyń quqyǵyn qorǵaýdy kúsheıtý, aqparattyq júıe men elektrondy saýdaǵa qa­tysty zań jobalarynyń erejelerin keńeıtý, jeke habar­landyrýlardyń ınternet-alańynda qoǵamdyq qaty­nastardy retteýdiń norma­tıvtik-quqyqtyq aktilerin engizýge birqatar depýtattyq bastama qabyldandy. Tuty­ný­shylar quqyǵyn qorǵaý komıtetiniń tóraǵasy Asqar Tynysbekulynyń aıtýynsha, zań jobasyndaǵy jańashyldyqtar aıasynda tutynýshyǵa óz quqyǵyn qorǵaý joldaryn tańdaý usy­nylady. Qoldanystaǵy tuty­ný­shy quqyǵyn qorǵaý týraly zańǵa sáıkes, tutynýshy sot­ta quqyǵyn qorǵaý úshin dá­ıekti mindetti kezeńderden ótýi kerek. Nátıjesinde, tuty­ný­shy kúrdeli, kóp deńgeıli bıýro­kratııaǵa tap bolady. Osyǵan baılanysty zań jobasynda tutynýshyǵa óz quqyǵyn qorǵaý tásilinde sotqa tikeleı talap qoıý nemese memlekettik organǵa júginý múmkindigi usynylmaq. Sondaı-aq osy salada ombýdsmen engizý máselesi qarastyrylǵan.

Qoldanystaǵy zań aıasynda oflaın satýshyǵa qoıylatyn talaptar onlaın rejimde de qoldanylady. Byltyr osy segmenttegi tutynýshylar shaǵy­my­nyń sany aldyńǵy jylmen salystyrǵanda 3 ese, ıaǵnı 2,6 myńnan 7,7 myńǵa deıin ósken. Jalpy, tutynýshylar quqyǵyn qorǵaýdyń júıesi ótken jyly tutynýshynyń quqy­ǵyn qamtamasyz etý algo­rıtmine negizdelip qaıta qu­ryldy. Tutastaı alǵanda, zań jo­ba­sy tutynýshynyń quqy­ǵyn jan-jaqty jáne tıimdi qor­ǵaý­dy qamtamasyz etýge, qo­ǵamda ha­lyq­tyń ómir súrý sapasyn arttyryp, úkimettik emes ıns­tıtýttar rólin kúsheıtýge baǵyttalyp otyr.

Tutynýshylar shaǵymyn taldaý nátıjeleri jyl saıyn Úkimet janynan qu­ryl­ǵan Tutynýshylardyń quqyq­taryn qorǵaý jónindegi vedomst­voaralyq keńestiń qaraýyna shyǵarylady. Onda memlekettik organdar jumysynyń qory­tyndylaryn talqylaý, oryn alǵan olqylyqtardy anyqtaý jáne tıisti sheshimder qabyldaý josparlanǵan.