Úkimet alapat sý tasqynynan keıin shaǵyn jáne orta bıznestiń múlikke qatysty shyǵyndaryn óteý úshin óz rezervinen 12 mlrd teńgeden astam qarjy bóldi, dep jazady Egemen.kz.
Zardap shekken bızneske keltirilgen zalaldy óteý jumysy bastaldy. Qazirgi tańda óńirlik komıssııalar shaǵyn jáne orta kásipkerlik sýbektileriniń jalpy somasy 1,5 mlrd teńgege 178 ótinimin qarap, maquldady.
Ákimdikterdiń aldyn ala baǵalaýy boıynsha 746 shaǵyn jáne orta bıznes sýbektisi zardap shekti. Olardyń qatarynda azyq-túlik dúkenderi, kafeler, TQKO, qonaq úıler jáne basqalary bar. Búginde baǵalaý jáne smetalyq jumystar júrgizilip jatyr, olardyń qorytyndysy boıynsha ótinimder óńirlik komıssııalardyń qaraýyna engiziledi. Osylaısha, Úkimet rezervinen 12 mlrd teńgeden astam qarajat shaǵyn jáne orta bıznes múlik shyǵyndaryn óteý úshin Aqmola, Aqtóbe, Atyraý, Batys Qazaqstan, Qostanaı jáne Soltústik Qazaqstan oblystarynyń bıýdjetine aýdarylady.
Aıta keteıik, buǵan deıin tótenshe rezervten Batys Qazaqstan jáne Qostanaı oblystarynda áýedegi elektr berý jelilerin qalpyna keltirýge 2,4 mlrd teńgeden astam qarjy bólingen edi.