Reseıdiń shaıbaly hokkeıden chempıonatyna qatysatyn Magnıtogorskiniń «Metallýrg» klýby bıylǵy sáýirde «Gagarın» kýboginiń ıegeri atanǵan edi. Qalyptasqan dástúr boıynsha komanda oıynshylary kýbokti ózderiniń týǵan jerlerine aparyp tanystyrady. «Metallrýgtiń» eki oıynshysy «Gagarın» kýbogin kóterip Ulytaý oblysyna keldi. О́ıtkeni...
Komandanyń eki oıynshysy Sátbaev qalasy hokkeı mektebiniń túlekteri. Olar – Valerıı Orehov pen Nıkıta Mıhaılıs. Kezinde «Qazaqmys» korporasııasynyń komandasynda shyńdalǵan olar keıin elimizdiń ulttyq quramasynda álem chempıonatyna qatysqan edi. Shette júrse de týǵan eldiń abyroıyn asqaqtatyp júrgen qos oıynshyny ulytaýlyqtar jyly qarsy aldy. Oblys basshylyǵynda arnaıy qabyldaý ótkizildi.
Valerıı men Nıkıta Jezqazǵan qalasyndaǵy M.Qulysheva atyndaǵy balalardy qoldaý ortalyǵynda boldy, qalanyń Ortalyq stadıonynda sportsúıer qaýymmen júzdesti.
«Qos oıynshynyń qol jetken jetistikteri úshin qýanyshtymyz. Olardyń sport jolyndaǵy tabystary keıingi jasóspirimderge tamasha úlgi boldy», deıdi «Ulytaý oblysynyń joǵary sport sheberligi mektebi» KMM basshysy Saıat Balmaǵanbetov.
Ulytaý oblysy