Sharýa baqqan jannyń aınaldyrǵan isinen basqa jumysy bola qoımaıdy. Ásirese aýylda. Eskiniń adamdary qazirgideı uıaly telefon ustap, áleýmettik jelige shuqshıyp, ár nárseniń basyn bir shalyp, shatty-butty bolmaǵanyn jaqsy bilemiz. Áńgimeleri ornyqty keletin. Qazir jurnaǵy qalmaı barady. О́tkende ǵoı, aýylda alpysty alqymdaǵandardyń biri qonaqta saıqymazaq qurdasy men ázilkesh aǵasynyń arasyna túsip qalypty da, aýyz tıgeni bolmasa, kúlkiden et jeı almaı shyǵypty.
Áńgimeni birinen biri ilip alyp, qaljyńdy qap-qabymen basynan tókken sııaqty. Kezinde monsha jaqqan biri aýyl basqarmasynyń arqasyn ońdyrmaı kúıdirgenin áńgimeleı kelip: «jon terisi ystyqtan jıdigende, arqasy KSRO-nyń kartasyna aınalyp shyǵa keldi», dese kerek. Basqarmany bilmegen bolyp ádeıi kúıdirdi me, kezdeısoq pa, ol jaǵy basqa áńgime. О́ıtkeni úlkenderdiń esebi men shaldardyń saıasaty anaý-mynaýǵa aldyra bermeıdi. Qurdasy zamandasynyń álgi sózine jáne basqa da qaljyńdaryna qyran-topan kúlkige qalǵan da, tamaq ishe almaı qaıtqan. «Aınalyp kelip kúsh alǵanda segiz metrden teýip qulatady bir nemerem. Ana Olımpıada komıtetindegiler qaıda qarap júrgenin bilmeımin. Bizdiń uldy aparsa, daıyn chempıon» degen be, ne kerek, qurdasynyń ishek-silesin qatyrǵan.
Álgi ázilkeshterdiń qaı-qaısysy bolsyn bir-bir keıipker. Bálkim bolmaı qalǵan tulǵalar. Bireýler bes jyl oqyp, birneshe jyl sahnada shyńdalsa, bular týa salǵan ártister. Qashannan halyq arasynda úzilmeı kele jatqan ázilkeshter men saıqymazaqtar mektebin joqqa shyǵarmaýymyz kerek. Oqyp, arnaıy bilim almasa da aýyldaǵy eldiń alǵash kóńilin kóterip, qııalyna qanat bitirgen osylar. Táýelsizdikpen talasa týǵan bizdiń býyn eseıip, qalaǵa kóshkenshe teatr tamashalap, tiri ártis kórgeni shamaly. Qazir alysty jaqyndatyp, jaqyndy alystatatyn áleýmettik degen sumdyq úlkendi kishiden, aǵany iniden aıyrýǵa tyrysyp-aq tur. Aıtqyshy men ázilkeshi, atbegisi men ańshysy, tipti aqyny men ánshisi bar ǵoı sol aýyldardyń. Ortalaryna alyp shyǵyp, tilin taýyp áńgimesin aıtýǵa jeteleıtinder az, biraq. Atam qazaqtyń «aýyldaǵynyń aýzy sasyq...» degen máteli aıtylǵan zamanynan beri áli kúnge eskirmeı kele jatqany, árıne, olardyń emes, oqyǵan-toqyǵan bizdiń kinámiz shyǵar múmkin.
Sharshaǵandar aýylǵa tartyp turatyn sebebi ne eken osy?