«Aýyl» partııasynyń bastamasymen Aqmola oblysy Aqkól aýdanynyń Amangeldi aýlynda «Qaz haby» jobasy iske qosyldy. Joba aıasynda aýyl turǵyndaryna 15 kúndik 800 qaz balapany men 625 kılo qurama jem taratyldy.
Joba maqsaty – aýyl turǵyndaryn sýda júzetin qustardy ósirý tehnologııasyna úıretý, aýyl jurtynyń tabysyn arttyrý, bolashaqta kooperasııa qurý. Joba aıasynda ár otbasy 160 qaz ben 125 kılo qurama jem alyp, 5 aıdan soń, ıaǵnı qarasha-jeltoqsan aılarynda Astana qalasynyń ınvestor-turǵyndaryna taza salmaǵy 4,4 kılodan kem emes árbir tórtinshi qazdy keri ákelip tapsyrady. Osylaısha, jobaǵa qatysýshy ınvestorlarǵa 160 óskeleń qaz balapanynan jalpy salmaǵy 176 kılo taza etti quraıtyn 40 qazdy ǵana qaıtarady. Qalǵan 120 qaz jobaǵa qatysýshyda qalady. Qaz kútimin jasaı bilse, 5 aıda shamamen 1 mln teńge tabys tabý múmkindigi bar.
Bolashaqta Aqkól aýdanynda ınkýbasııalyq jumyrtqa óndirý, ınkýbatorıı, mal azyǵy sehy, soıý sehy, soıylǵan ónimdi, mamyq pen qaýyrsyndy qaıta óńdeý, etti konservileý úshin qaz fermalaryn qurý jobalaryn qolǵa alý josparlanǵan. Bıznestiń joǵaryda atalǵan barlyq baǵyty bolashaqta Aqkól aýdanynda «Qaz habyn» qurýǵa yqpal etpek.