Ulttyq bank Ulttyq qordyń qarajatynan sıfrlyq teńge (budan ári – ST) platformasyn paıdalaný boıynsha pılottyq jobanyń sátti iske qosylǵany týraly málimdedi. Ulttyq sıfrlyq valıýtany engizýdiń ekinshi kezeńi aıasynda sıfrlyq teńge «Dostyq-Moıynty» temir jol ýchaskesin salýǵa jumsalady, dep habarlaıdy Egemen.kz Qazaqstan Ulttyq bankiniń baspasóz qyzmetine silteme jasap.
Aıta keterligi, sıfrlyq teńgeni baǵdarlamalaý tehnologııasy Ulttyq qor qarjylandyratyn joba aıasynda testileýden ótip jatyr.
Joba avtorlarynyń aıtýynsha, sıfrlyq teńgeni baǵdarlamalaý tehnologııasy qarjy ıesine ony óz betinshe baqylaýǵa jáne tıimdi jumsaýǵa múmkindik beredi. Mundaı júıe tańbalaý tehnologııasy bólingen qarajattyń nysanaly jumsalmaý táýekelderin azaıtady. Sondaı-aq memlekettik qarjy jumsaýdyń aıqyn jáne tıimdi bolýyn qamtamasyz etýge yqpalyn tıgizedi.
«Pılottyq jobany iske qosý barysynda sıfrlyq teńge platformasynda jobany qarjylandyrýǵa bólingen aqshaǵa tańba qoıyldy. Tańbalanǵan sıfrlyq teńge qajetti mindettemelerdi tolyq kólemde oryndaǵan uıymdardyń atyna ǵana tólenedi. Tańbalanǵan ST-men esep aıyrysý túpkilikti ónim berýshiler men merdigerlerge deıin búkil taýar jetkizý tizbegi boıynsha júrgiziledi. Barlyq tutynýshynyń sıfrlyq teńgedegi shottarǵa qol jetkizýi naryqqa qatysýshylardyń qoldanystaǵy ınterfeısteri arqyly ádettegi formatta uıymdastyrylǵan», delingen habarlamada.
Pılottyq joba «Samuryq-Qazyna» AQ-men, «Qazaqstan temir joly» ulttyq kompanııasy» AQ-men, «Qazposhta» AQ-men jáne «Qazaqstan Halyq Banki» AQ-men birlesip iske qosylǵan.
«Bul pılottyq jobany damytý aıasynda sıfrlyq teńgeni tańbalaý úshin etalondyq derekkózderdi (aqparattyq júıelerdi) keńeıtý, naryqqa qatysýshylardyń (ekinshi deńgeıli bankterdiń) sanyn keńeıtý jáne Ulttyq qordyń bıýdjetinen qarjylandyrylatyn ózge de jobalarǵa arnalǵan platformany paıdalaný josparlanǵan.
Sonymen qatar QR Úkimeti men QR Sybaılas jemqorlyqqa qarsy is-qımyl agenttigi birlesip, aýyl sharýashylyǵy, qurylys salalarynda bıýdjet qarajatyn nysanaly memlekettik jumsaý, sondaı-aq memlekettik qoldaý sharalaryn sıfrlandyrý boıynsha birneshe pılottyq jobany iske asyryp jatyr. Salyqtyq ákimshilendirýdi sıfrlandyrý, ulttyq sıfrlyq valıýtalardaǵy transshekaralyq esep aıyrysý jáne sıfrlyq aktıvter salasyndaǵy esep aıyrysý boıynsha pılottyq jobalar da josparlanǵan», delingen Ulttyq bank habarlamasynda.