Ońtústik Koreıada astanalyq sýretshi, grafıkalyq dızaıner Baqyt Shúketaevtyń kartınalarynyń kóshirmeleri kórsetildi. Sheberdiń týyndylary Hangýk shet tilder ýnıversıteti uıymdastyrǵan kórmege qoıyldy. Kartınalardy atalǵan joǵarǵy oqý ornynyń professory Chý Ion Mın Seýlge alyp kelgen.
Is-shara shahardyń tanymal tarıhı ortalyǵynda – HanOk dástúrli koreı úıinde ótken. Aıta keteıik, bul – Ońtústik Koreıa astanasynda Eýrazııa elderi sýretshileriniń alǵashqy kórmesi. Uıymdastyrýshylar is-sharany jyl saıyn ótkizýge nıetti ekendikterin aıtty.
«Bul kórme arqyly biz Eýrazııa men Ońtústik Koreıa óneriniń tyǵyz baılanysyn kórsetip, mádenı almasýdy jandandyrýdy qalaımyz. Koreı keskindemesindegi negizgi boıaýlar qazaqstandyq sýretshiniń týyndylarynda da bar», deıdi professor Chon Bo Yn.
«Men Astanada bir ret boldym. Búgin qazaq sýretshisiniń kartınalarymen tanysyp, keıin Qazaqstanǵa arnaıy baryp, sýrettegi ásem jerlerdi óz kózimmen kórmekpin. Búrkittiń sýreti Qazaqstan týyndaǵy beıneni esime túsirdi. Qazaqtyń oıý-órnekteri de óte ádemi», dep tamsandy kórmege kelgen kórermen. Aıta keteıik, sýret kórmesi jergilikti halyqty Eýrazııa elderiniń mádenıetimen tanystyrýdy maqsat etip otyr.