Ataqty gollıvýd akteri Mads Mıkkelsen Astanadaǵy ComicCon festıvaliniń arnaıy qonaǵy boldy. «Gannıbal» jáne «Doktor Strendj» juldyzy Qazaqstannyń astanasyna tánti bolyp, aldaǵy Dúnıejúzilik kóshpeliler oıyndarynyń bir bólshegi bolǵysy keletinin aıtty, dep habarlaıdy Egemen.kz qala ákimdiginiń resmı saıtyna silteme jasap.
Mads Mıkkelsen Astanany jaqsy bilmese de, oǵan qala qatty unaǵanyn aıtty.
«Men Astanany jaqsy bilemin dep aıta almaımyn, óıtkeni munda nebári 30 saǵat qana boldym. Biraq qala óte ádemi dep senimdi túrde aıta alamyn. Taǵamdaryńyz erekshe unady, óte dámdi. Men kóp et jedim, ony qansha jegenimdi de aıta almaımyn, bul keremet. Biz Danııadan bolǵandyqtan, Astanany velosport komandasy arqyly bilemiz. Biz Týr de Fransqa barǵan kezde sizderdiń velo komandalaryńyz tanymal boldy. Olardyń velosıped jarysyn kórý keremet bolar edi. Men kóshpeliler oıyndaryn kórip qana qoıǵym kelmeıdi. Olardyń bir bólshegi bolyp, qus ustap, atqa mingim keledi», dedi akter.
Mads Mıkkelsen – Gollıvýd akteri, ol «Gannıbal» jáne «Doktor Strendj» sııaqty fılmderdegi rólderi arqyly búkil álemge tanymal.