Senim artqandardyń súreńsiz óneri

Biraz boksshynyń baǵy janbady

Aldymen boksshylarymyzdyń bá­sekesi jóninde. Myrzaǵalı Aıtjanov bokstan ulttyq quramanyń bas bapkeri laýazymyn arqalap, osymen úshinshi márte jazǵy Olımpııa oıyndaryna qatysyp otyr. Bilikti mamannyń 2012 jylǵy London, 2016 jylǵy Rıo Olımpııa oıyndarynda boksshylardy zaý bıikke shyǵarǵanyn maqtan tutamyz. 2009-2018 jyldar aralyǵynda eki olımpıadalyq sıklda bas bapkerlik qyzmettiń jaýap­kershiligin arqalaǵan maman 2023 jyl­dyń qańtarynda osy qyzmetke qaıta taǵaıyndaldy. Biraq bas bapkerdiń úmit artqan 7 boksshynyń úsheýi alamannyń alǵashqy aınalymynda-aq súrinip, Olımpııa oıyndaryn aıaqtady. Ulttyq quramanyń kapıtany, Parıj jazǵy Olımpıadasynyń saltanatty ashylý rásiminde Sena ózeniniń ústinde týymyzdy alyp shyqqan Aslanbek Shymbergenov (71 kg), asa aýyr salmaqta (+91 kg) Tokıo jazǵy Olımpııa oıyndarynyń qola júldegeri Qamshybek Qońqabaevtyń jeńilisi jóninde jazyldy.

Keshe Parıj rıngine álem chempıo­ny, álem birinshiliginiń kúmis júl­degeri Mahmud Sabyrhan (57 kg) shyq­ty. Qarsylasy – Eýropa chempıony ıspanııalyq boksshy Hose Brotons Kvıles. Úsh raýndtyń nátıjesin túzgen tóreshiler jeńisti ıspanııalyq boksshyǵa berdi. Mahmud jazǵy Olımpııa oıyn­daryna tuńǵysh ret qatysyp otyr. Buǵan deıin ol 54 kg salmaq dárejesinde álem chempıo­ny atandy. Bul salmaq Olımpıadalyq oıyndarǵa enbegendikten de 57 kg salmaqqa byltyr aýysty. Bir jyldyń bederinde jańa salmaqqa túbegeıli beıimdelip, aýrasyn tolyq baǵamdaı almaǵany anyq baıqaldy. Al qarsylasynyń boıy da bıik, qoly da uzyn, jerlesimizdiń ja­qynnan oraı soqqan soqqylaryn ózine meılinshe darytpady. Rıngten uzaǵan soń Mahmud jeńilisi týraly pikirin aıtty.

«1-raýndta sózsiz barymdy saldym, tipti jeńis maǵan beriletinine senimdi boldym. Biraq bes tóreshiniń tórteýi qarsylasymnyń upaıyn molaıtty. Sol bárin tas-talqan etti, psıhologııalyq turǵyda syndyryp jibergendeı boldy. Tóreshilerdiń qysastyq jasaǵanyn alǵashqy raýndta-aq bildim. 2-raýnd ta solaı boldy. Úshinshi raýndtyń nátıjesi eshteńege áser etpeıtini belgili edi. Dese de jeńilgendi de moıyndaý kerek, qarsylasym ońaıdan emes, fızıkalyq qýaty da myǵym eken, boıshańdyǵy, qolynyń uzyndyǵy da aıtarlyqtaı kedergisin keltirdi», dedi M.Sabyrhan.

Eldos Saıdalın baptaıtyn áıelder quramasynyń múshesi Valentına Halzova 75 kg salmaq dárejesinde Olımpııa oıyn­daryna alǵash ret qosylyp, birinshi jekpe-jeginde ese jiberdi. Panamalyq Ateıla Baılonǵa qarsy aıqastyń 1-raýndynda tóreshiler Valentınanyń soqqysy kóbirek daryǵanyn baǵamdaǵanymen, qalǵan eki raýndta jeńisti qarsylasyna burdy. Valentına ekinshi raýnd bastal­ǵanda qarsylasy basymen soǵyp, murnyna zaqym kelgenin aıtty. Tipti eki raýnd boıy tynysy tarylyp, ókpesi qysqanyn jetkizdi.

«Qarsylasym – 35 jasqa tolǵan óte tájirıbeli boksshy. Birinshi raýndta basym túsken soń, 2, 3-raýndta barymdy saldym. Tóreshilerdiń sheshimi solaı bolsa, ne shara? Bapkerdiń aıtqan taktıkalyq josparyn tolyqqandy oryndadym. Men úshin alǵashqy Olımpııa oıyndarynyń osylaı aıaqtalǵany ókinishti. Kók týymyzdy jelbiretkim kelip edi», dedi Valentına.

2016 jyly Rıo jazǵy Olımpıadasynda 9-orynǵa turaqtap, 2021 jyly Tokıo dodasynda shırek fınalda súrinip, 5-satyny mise tutqan panamalyq Ateıla Baılon tisqaqqan boksshy ekenin kórsetti.

Álem chempıonatynyń eki dúrkin jeńimpazy Nazym Qyzaıbaı (50 kg)

al­ǵashqy aınalymda ıtalııalyq Djor­danna Sorrentınodan basym tústi. 31 jasynda jazǵy Olımpııaǵa tuńǵysh ret at baılaǵan jerlesimiz keshe 1/8 aınalymda brazılııalyq Karolın de Almeıdamen aıqasty. Kezdesýdiń alǵashqy raýndynda Nazym qarsylasynan 5:0 alǵa shyǵyp, keıingi raýndtarda osy qarqynynan qaıtpady. Ekinshi jáne úshinshi raýndta birdeı 4:1 esebimen utty. Osylaısha senimdi jeńiske jetken boksshymyz endi shırek fınalda kúsh synaıdy. Qarsylasy – kolýmbııalyq Valensııa Vıktorııa Ingrıt Lorena.

Orta joldan qaıtty

Ústel tennısinen ulttyq quramanyń múshesi Kırıll Gerasımenko Parıj jazǵy Olımpıadasynyń 1/8 fınaldyq synynda súrindi. Mysyr sportshysy Omar Muhammadı-Assardan asa almady. Birinshi, ekinshi sette 11:8, 11:6 esebimen aıqyn utqan jerlesimiz úshinshi, tórtinshi sette qarsylasynyń shabýylyna qaýqar tanyta almady. Sheshýshi besinshi sette de mysyrlyq Omardyń mereıi ústem túsip, jerlesimiz jarys jolynan shyǵyp qaldy. Kırıll birinshi aınalymda chılılik Nıkolas Vargasty aıqyn utqan. Ekinshi kezeńde germanııalyq Dan Sıýdan basym túsken edi. Afrıka qurlyǵynyń chempıony Omar Kırıll úshin syralǵy qarsylas, ekeýi buǵan deıin de birneshe márte tartysqa túsip, jeńisti alma-kezek ıelenip júrdi.

Stend atýdan trap baǵdarlamasynda synǵa túsken Marııa Dmıtrıenko 120 upaı enshilegenimen, jalpy esepte 10-satyǵa turaqtap, fınaldyq dodaǵa óte almady.

Nysana kózdeý tartysynda vıntovkamen 50 metrden úsh pozısııada nysana kózdeýden jekeleı saıysqa qatysqan Islam Sátbaev 588 upaımen 18-oryndy mise tutty. Taǵy bir sportshymyz Konstantın Malınovskıı 586 upaıǵa ıelik etip, 25-satyǵa ornyqty.

Ekaterına Shabalına trıatlonnan saıysqa qosylǵan. Sena ózenin júzip ótýde qoıý shańnyń arasynan kóringen jerlesimiz velosıpedpen júıtkýde jarysty jalǵastyra almaı, orta joldan aıaqtady.

Sporttyq gımnastıkadan erler dodasynda Mılad Karımıdiń sheber­liginen qalyń jankúıer orasan olja kútkeni belgili. Sebebi Parıj jazǵy Olımpıadasyna deıin qatysqan álemdik dodalarda top jaryp, talantymen daralandy, kórermenniń kózaıymyna aınaldy. Kópsaıysta baq synaǵan jerlesimiz ózine ońtaıly jattyǵýlaryn oryndaýda súrinip, upaı joǵaltty. Mılad Karımı úshin kópsaıysta kúsh synaý oń jambasyna kelmeıdi. Dese de ol osy alty jattyǵýda 76.065 upaımen 24-orynǵa turaqtady. Snarıadtaǵy jattyǵýda jo­ǵary upaıǵa qol jetkize bermeıtin Mılad bul joly kerisinshe táýir upaı jınady. Endi ol erkin jattyǵýdan Olımpıada medali úshin tartysqa túsedi.

Sadaq atýdan jekeleı saıysta Dáý­letkeldi Jańbyrbaı irikteý keze­ńinde kolýmbııalyq Horhe Enrıkemen básekege túsken. 7:3 esebimen kolýmbııalyq mer­genniń mereıi ústem boldy. Dáýlet­keldi buǵan deıin komandalyq tar­tysqa da qatysyp, Italııa sadaqshylaryna ese ji­berdi. Jekeleı synda Ilfat Abdýl­lın kanadalyq qarsylasynan asa almaı Olımpıada saparyn aıaqtady.

Dzıýdo kúresinen erler synynda Nur­lyhan Sharhan (100 kg) jazǵy Olımpıada dodasynyń ekinshi aınalymynda súrindi. Alǵashqy beldesýinde bel­gııalyq Toma Nıkıforofpen kúresken jerlesimiz qarsylasynan basym tústi. Tóreshi belgııalyq balýannyń sylbyr beldeskeni úshin úsh shıdo (eskertý) berip, dodadan qaıtardy. Biraq ekinshi aınalymda Nurlyhannyń álem chempıony, ózbek alyby Muzafarbek Turobaevqa kúshi jetpedi. Boıy áldeqaıda uzyn, kúshi de myǵym qarsylasy jerlesimizdi ıppon upaıymen aıqyn jeńdi.