Ǵylym jáne joǵary bilim mınıstrligi shetel azamattaryna arnalǵan stıpendııalyq baǵdarlamanyń qorytyndysyn jarııalady.
2019 jyldan bastaý alǵan bul baǵdarlama jyl saıyn grant sanyn kóbeıtip keledi. Máselen, bıyl elimizdiń joǵary oqý oryndaryna túsý úshin shetel azamattaryna 550 granttyq oryn taǵaıyndaldy. Atalǵan baǵdarlamaǵa shetel azamattary, onyń ishinde Qazaqstan azamattyǵy joq etnostyq qazaqtar qatysa alady.
Bul stıpendııalyq joba elimizdiń basqa memlekettermen bilim berý baılanysyn nyǵaıtýǵa baǵyttalǵan. 2024 jyly 83 elden 11 293 ótinim kelip túsken. Bul atalǵan baǵdarlamaǵa degen qyzyǵýshylyqtyń jyl saıyn artyp kele jatqanyn kórsetedi.
Shetel azamattaryna arnalǵan 550 granttyq orynnyń ishinen: 490 oryn – bakalavrıat baǵdarlamasy úshin; 50 oryn – magıstratýra baǵdarlamasy úshin; 10 oryn doktorantýra baǵdarlamasy úshin bólindi. Baǵdarlama aıasynda tegin bilim berý men bilim alýshynyń akademııalyq jetistikterine baılanysty aı saıyn stıpendııa tólenedi.
Saraptama komıssııasynyń múshelerimen áńgimelesý qorytyndysy boıynsha stıpendıattardy irikteý jónindegi konkýrstyq komıssııanyń qaraýyna «Doktorantýra» baǵdarlamasy boıynsha – 56 úmitker, «Magıstratýra» baǵdarlamasy boıynsha – 286 úmitker, «Bakalavrıat» baǵdarlamasy boıynsha 1 914 úmitker jiberildi. Úmitkerler joǵary akademııalyq kórsetkishterge qarap irikteledi.