Qaraǵandy oblysynda eki kishkentaı qyzyn tunshyqtyryp óltirgen 20 jastaǵy kelinshek 20 jylǵa sottaldy. Al tiri qalǵan bir jasqa tolar-tolmas nárestesi Balalar úıine ótkizildi, dep habarlaıdy Egemen.kz.
KTK telearnasy jazǵandaı, ol tuńǵyshyn 16 jasynda bosanyp, odan keıin taǵy eki bala tapqan, keıingi ýaqytta basqa er kisimen azamattyq nekede bolǵan. Ekeýi Temirtaý irgesindegi Gagarın aýylynda turǵan.
4 sáýirde eri jumysymen qalaǵa ketken. Sottaǵy túsiniktemelerine sáıkes, ol tamaq surap jylaı bergen eki jáne tórt jastaǵy qyzdaryn tynyshtandyrmaq bolǵan. Tósekke jatqyzyp, ústine kórpe jaýyp tapjyltpaı basyp otyrady.
"Jylaǵanyn qoıǵanda ashsam, ólip qalypty" dep aqtalǵan. "Baıqaýsyzda boldy" dep jazany jeńildetýdi surady, biraq onyń istegeni "Qasaqana kisi óltirý" babyna jatqyzyldy. Tipti emizýli balasy bar ekeni de jazany jeńildetken joq.
- Jasóspirim balalary bolsa, bul - qylmystyq jazany jeńildetetin jaǵdaı. Alaıda QR Joǵarǵy sotynyń tıisti normatıvtik qaýlysyna sáıkes, eger qylmys óziniń jasóspirim balasyna qatysty jasalsa, qylmystyq jazany jeńildetetin mán-jaıǵa jatqyzylmaıdy. Ol "baıqaýsyzda óltirdim" dep otyr, biraq onyń qasaqana óltirgeni jóninde kinási is materıalymen, saraptama qorytyndylarymen dáleldendi, - dedi Qaraǵandy oblysy mamandandyrylǵan aýdanaralyq qylmystyq ister jónindegi sotynyń tóraǵasy Bekzat Shalǵymbaev.